Ամփոփելով նախորդ տարին` «Հայավտոճան» ՊՈԱԿ գլխավոր տնօրեն Հենրիկ Քոչինյանը այսօր լրագրողների հետ հանդիպման ընթացքում նշեց, որ կատարվել են լայնածավալ շինարարական աշխատանքեր՝ Երևանից Աշտարակ, Երևանից Թալին ուղղությամբ: Բացի այդ, ըստ բանախոսի, կարևոր էր Բերդի շրջանում ճանապարհաշինարարական աշխատանքների իրականացումը:
«Դա ծայրամասային շրջան է, ճանապարհն ամբողջովին քայքայված , իսկ հիմա վիճակը բավականաչափ բարելավվել է: Ապարան քաղաքի ներսում երեքուկես կիլոմետրանոց ճանապարհ է վերանորոգվել: Ընդհանուր առմամբ այն համայնքները, որոնք բավարար ճանապարհներ չոնեին, փորձել ենք բարելավել:
Ամենադժվար խնդիրը Այրումում ճանապարհի կառուցումն էր, բայց դա էլ կարողացանք անել նախորդ տարի: 2012-ին փորձել ենք պետական բանկի բյուջեով, Համաշխարհային բանկի ֆինանսավորմամբ կառուցել այն ճանապարհները, որոնք երկար ժամանակ խնդրահարույց են եղել»,- ասաց Քոչինյանը:
Նա նշեց, որ նախարարությունը պայմանագրային կարգով աշխատում է տեխնիկական վերահսկողության կազմակերպության հետ, որն էլ հսկում է, որ ամեն ինչ կատարվի շինարարական նորմերին համապատասխան՝ ճիշտ նյութեր օգտագործվեն, գլուխ չպահեն և այլն:
Բանախոսի դիտարկմամբ` կապալառու կազմակերպությունների մոտ զգալի չափով գումարներ են պահվում. «Մենք ինը մարզում ստուգումներ ենք կատարել, արդյունքում վեց-յոթին լավ գնահատական ենք տվել, նույնքանը ոչ բավարար գնահատականի են արժանացել: Եթե դժգոհությունները շատ խիստ են լինում, ապա նրանք ստիպված են լինում սեփական միջոցներով նոր աշխատանք սկսել, այսինքն` այդ ճանապարհը նորից կառուցել: Նշեմ նաև, որ կատարվում են լաբորատոր ստուգումներ, և հանձանարարություն է տրվում թերացումները վերացնելու ուղղությամբ»:
Քոչինյանը նշեց, որ ամենալավ վիճակն այժմ Արարատի և Արմավիրի մարզերում է, իսկ միջհամայնքային ճանապահների ամենավատ վիճակը Շիրակի մարզում է՝ Ամասիա և Աշոցք շրջանում. «Այնտեղ հողային ճանապարհներ են, և երկար ժամանակ ոչինչ չի կատարվել»:
Ասուլիսի վերջում բանախոսը նշեց, որ այս տարի պետական բյուջեից երեքուկես միլիարդ է հատկացվելու ճանապարհների կառուցման համար, քառասուն միլիոն էլ Համաշխարհային բանկն է տրամադրելու. «Պետք է Գորիս-Կոռնիձոր գյուղի ճանապարհը կառուցենք: Դա սահմանամերձ գյուղ է, և այնտեղ ապրող մարդը պետք է վստահ լինի, որ նորմալ հաղորդակցություն կարող է ունենալ»:
