Դեդ Հասան արքայի աթոռը երբեք թափուր չի մնա: Դեդ Հասանին փոխարինողներ կան և կլինեն: Այսօր լրագրողների հետ հանդիպման ժամանակ այս մասին ասաց քրեագետ Սերգեյ Գալոյանը՝ անդրադառնալով ռուսական քրեական հեղինակություն Դեդ Հասանի մահվանը:
Ըստ քրեագետի՝ այսօր շրջանառվում է չորս անուն, որոնցից մեկն ազգությամբ եզդի է, սակայն նրանց մեջ հայ չկա: Սերգեյ Գալոյանը չբացահայտեց, թե ովքեր են նրանք: «Հայերի համար փոխվեց այն, որ Դեդ Հասանը մեծ կապեր ուներ հայերի հետ: Հիմա նրա փոխարեն կգա մեկ այլ հեղինակություն, ով գուցե այդ հարաբերությունները չունենա հայերի հետ»,- նշեց Սերգեյ Գալոյանը: Վերջինիս խոսքով՝ Դեդ Հասանի սպանության հիմնական կասկածյալն է վրացի օրենքով գող Տարիել Օնիանին՝ Տարոն:
Հարցին, թե ով է «օրենքով գող»-ը, պատասխանեց` այն մարդը, ով կրիմինալ անցյալ ունենալով, քրեական հիմնարկներով անցնելով, ստանալով «օրենքով գողերի» հովանավորություն` «սխոդկայի» ժամանակ ճանաչվում է «օրենքով գող»: «Վեց կանոն պետք է պահպանի «օրենքով գողը», սակայն այսօր ամեն բան խառնվել է: Հեղինակությունը շատ ավելի փոքր է, քան «օրենքով գողը»»,- հստակեցրեց Սերգեյ Գալոյանը:
