Ֆրանսիայում Սուրբ Ծնունդի նախաշեմին բուժաշխատողները գործադուլներ են կազմակերպել, գրում է TASS-ը:
Առաջինը գործադուլի մասին հայտարարել են անհապաղ բժշկական օգնության ծառայության աշխատակիցները, ովքեր բողոքում են աշխատանքային ծանր պայմաններից և աշխատավարձերի բարձրացում են պահանջում:
Արհմիությունների գնահատականների համաձայն՝ ակցիային կարող են մասնակցել անհապաղ բուժօգնության ծառայության աշխատակիցների մինչև 80%-ը: Բողոքի ակցիայի մասնակցիները նշում են, որ գործադուլի օրերին բուժաշխատողները նախկինի պես կաշխատեն, սակայն իրենց խալաթներին հատուկ կապիչներ և բացատրական գրառումներ կփակցնեն:
Ներկա պահին գործադուլավորների և կառավարության միջև ինտենսիվ բանակցություններ են ընթանում: Ինչպես կառավարության նիստից հետո հայտարարել է առողջապահության նախարար Մարիսոլ Տուրենը՝ հավանականությունը մեծ է, որ արդեն մոտակա ժամերին կողմերը փոխհամաձայնության կգան: «Քննարկումները դրական արդյունք են տվել, ես փաստաթուղթ եմ ստորագրել աշխատանքային գրաֆիկների վերանայման վերաբերյալ, որը պետք է վերջ տա գործադուլներին»,- հայտնել է նախարարը:
Բժիշկների հիմնական պահանջներից մեկը ներկայիս շաբաթական 60 աշխատաժամերը 48-ով փոխարինելն է, ինչպես նաև արտաժամյա աշխատանքի դիմաց վճարելը: Արհմիություններում ենթադրում են, որ կառավարությունը պատրաստ է ընդառաջել բուժաշխատողներին, չնայած նշում են, որ այս պահին գործադուլի դադարեցման մասին խոսելը վաղաժամ է:
Երեքշաբթի գործադուլներ կարող են սկսել մնացած բուժաշխատողները: Ոլորտի միացյալ արհմիությունների կոչով նրանք հիվանդների ընդունելությունը կդադարեցնեն առնվազն մինչև դեկտեմբերի 31-ը:
