Արմավիրի մարզի ընդհանուր իրավասության դատարանում Արթուր Ադամյանի նախագահությամբ ավարտվել է Արման Ասատրյանի գործի դատական քննությունը:
Արմավիրի մարզի 31-ամյա բնակիչ Արման Ասատրյանը խնամքին մինչև 10 տարեկան 2 երեխա ունի, նախկինում դատված է եղել, այս գործով կալանքի տակ է 2014 թվականի հուլիսի 26-ից:
Արման Ասատրյանին մեղադրանք է առաջադրվել շահադիտական դրդումներով դիտավորյալ սպանություն կատարելու համար՝ ՀՀ քրեական օրենսգրքի 104 հոդվածի 2-րդ մասի 8-րդ կետով:
Ըստ մեղադրանքի՝ Արման Ասատրյանը 2010 թվականին դատապարտվել է գողության համար, պատիժը կրել է «Կոշ» ՔԿՀ-ում:
Այնտեղ ծանոթացել է Արմավիրի բնակիչ, դատապարտյալ Հովհաննեսի հետ: Իմացել է, որ Հովհաննեսի մայրը մշտական աշխատանք ու եկամուտ ունի, ապրում է միայնակ՝ Արմավիր քաղաքի շուկայի մոտ:
2014 թվականի փետրվարին՝ պատիժը կրելուց հետո, Արման Ասատրյանը որոշել է Հովհաննեսի մոր՝ Մանյակի տնից գողություն կատարել:
Հուլիսի 25-ի կեսօրին նա գնացել է Արմավիրի շուկայի մոտ, հարևաններից հարցուփորձ է արել ու պարզել Մանյակի տան տեղը:
Այնուհետև թակել է Մանյակի տան մուտքի դուռը: Տանտիրուհին բացել է դուռը, տեղեկացել, որ Արմանն իր որդի Հովհաննեսի կալանավայրային ընկերներից է: Նրան սիրով տուն է հրավիրել:
Գնացել են հյուրասենյակ: Մանյակը հարցուփորձ է արել իր ազատազրկված որդուց ու գնացել է խոհանոց՝ սուրճ եփելու:
Արմանն արագ մոտեցել է մուտքի դռանը, բանալիով փակել է, բանալին պահել է գրպանում:
Հյուրասենյակում Արմանը «Չիբուխ» ծխախոտ է ծխել, համոզվել, որ տանը ուրիշ մարդ չկա, խոսակցության ժամանակ Մանյակից ագրեսիվ տոնով գումար է պահանջել:
Մանյակը հասկացել է Արմանի մտադրությունը, վախեցած հետ է քաշվել ու ասել է, թե տանը գումար չունի:
Տանտիրուհին փորձել է վերցնել բջջային հեռախոսը և օգնություն կանչել: Արմանը երկու ձեռքով ամուր բռնել է բազկաթոռին նստած Մանյակի պարանոցը, սկսել է խեղդել:
Կինը սկզբում դիմադրել է: Արմանը բազմաթիվ հարվածներ է հասցրել նրա մարմնի տարբեր մասերին, հետո բազկաթոռի կողքին գտնվող պահարանից վերցրել է «զամշե գոտի», դրանով խեղդամահ է արել Մանյակին:
Սպանությունից հետո Արմանը սավանով կապել է Մանյակի գլուխը, իջեցրել է շորերը ու սկսել է գումար փնտրել: Հետո գումար ու արժեքավոր իրեր է փնտրել տանը: Ոչինչ չգտնելով՝ տանից վերցրել է երեք տեսաձայնագրիչ, մեկ բջջային հեռախոս և սպորտային հագուստ: Արմանը հեռացել է զոհի տանից՝ դրսից փակելով մուտքի դուռը: Ճանապարհին դեն է նետել բանալին:
Հափշտակված ավարը Արմանը տարել է իր տուն, որ հետագայում վաճառի:
Երեկոյան Մանյակի հարազատները տեսնելով, որ նա հեռախոսին չի պատասխանում, մուտքի դուռը չի բացում, դիմել են ոստիկանություն:
Ոստիկանները բացել են տան դուռը և հայտնաբերել են Մանյակի դին:
Սպանության հաջորդ օրը՝ հուլիսի 26-ին, իր գյուղից բերման է ենթարկվել Արման Ասատրյանը: Նա խոստովանել է հանցանքը: Նրա տնից առգրավվել են հափշտակված իրերը:
Ընդհանուր իրավասության դատարանում Արման Ասատրյանն իրեն լիովին մեղավոր է ճանաչել, հրաժարվել է ցուցմունքներ տալուց:
Սպանված կնոջ եղբայրը հայտնել է, թե քույրը մենակ է ապրել: Նրա ամուսինը 7-8 տարի առաջ է մահացել, իսկ որդին պատիժ է կրում կալանավայրում: Տուժողի իրավահաջորդը քաղհայցի պահանջ չի ներկայացրել, բայց խնդրել է, որ դատարանը ամբաստանյալին խիստ պատժի:
Արմանին ճանաչման են ներկայացրել Մանյակի հարևաններին, ում նա հարցուփորձ էր արել՝ Մանյակի տան տեղն իմանալու համար: Հարևանները ճանաչել են նրան:
Մանյակի հագուստների վրա հայտնաբերվել են Արմանի հագուստների մանրաթելերը: Արմանի ծխած ու զոհի տանը թողած ծխախոտի մնացորդի վրա եղել են նրա թքի հետքերը:
Դատարանն արձանագրել է, որ Արման Ասատրյանի պատասխանատվությունն ու պատիժը ծանրացնող հանգամանքներ են՝ հանցագործությունների կատարման վտանգավոր ռեցիդիվը և հանցանքը ալկոհոլի ազդեցության տակ կատարելը:
Արման Ասատրյանը մեղավոր է ճանաչվել շահադիտական դրդումներով կատարած դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 8-րդ կետով և դատապարտվել է 18 տարի ազատազրկման:
