Այս տարի պետբյուջեի միջոցներով` Համաշխարհային բանկի աջակցությամբ ԿԳ նախարարության կողմից իրականացվող «Նախադպրոցական կրթության որակի և մատչելիության ապահովման» ծրագրով, Սյունիքի մարզում կներդրվի մոտ 250 հազ ԱՄՆ դոլարին համարժեք դրամ:
Այդ ծրագրի համար մարզի համայնքներից ներկայացված 28 հայտից հավանության են արժանացել 22-ը: Ծրագրում ընդգրկված համայնքների նախադպրոցական տարիքի երեխաների կրթության և դաստիարակության համար գումարներ կներդնի նաև ՀՀ կառավարությունը: Մեկ այլ ծրագրով մարզի ավագ դպրոցների բարեկարգման և նորոգման նպատակով պետբյուջեից նախատեսված է տրամադրել 250 մլն դրամ:
Մինչև մայիսի 1-ը նախատեսվում է նաև Սյունիքի 7 դպրոցների տրամադրել 70 համակարգիչ, յուրաքանչյուրին` 10 համակարգիչ, իրենց համապատասխան բոլոր սարքավարումներով։ Այդ յոթ դպրոցներում կստեղծվեն գերժամանակակից տեղեկատվական համակարգչային լսարաններ: Կա նաև համակարգչային հագեցվածության լրացուցիչ ծրագիր մարզի ավագ դպրոցների համար: Մինչև եկող ուսումնական տարին Սյունիքի ավագ դպրոցները կստանան գերժամանակակից համակարգիչներ` իրենց բոլոր սարքավորումներով:
Սյունիքում գործող չորս ավագ դպրոցները կստանան նաև գրադարանային կահույք, գրադարանի համար համապատասխան պարագաներ:
Ներդրումներ կլինեն նաև Կապանի քոլեջում` շուրջ 100 մլն դրամ:
Այս բոլոր հարցերի մասին երեկ Սյունիքի մարզի կրթության ոլորտի պատասխանատուներին տեղեկացրել է կրթության և գիտության նախարար Արմեն Աշոտյանը, որը նաև խոստացել է այս տարվա ընթացքում լուծել ավագ դպրոցների դասագրքերի ապահովվածության հարցը:
