Վրացական Apsny.ge կայքի փոխանցմամբ, Վրաստանի բիզնես-օմբուդսմեն Գեորգի Պերտայան իր գոհունակությունն է հայտնել իսրայելական գործարարների գործի կապակցությամբ.
«Վրաստանում կաշառք տալու համար ժամանակին ձերբակալվել են մի շարք վրաց գործարարներ, հետևաբար նույնատիպ հանցագործության համար պետք է պատժվեն նաև օտարազգի գործարարները: Սա լավ դաս կլինի այն բոլոր ձեռնարկատերերի համար, ովքեր կարծում են, թե Վրաստանում կաշառքի միջոցով կարող են իրենց գործն առաջ տանել:
Սա լավ ազդանշան կլինի նաև օրինապահ գործարարների համար, ովքեր պատրաստվում են ներդրումներ կատարել Վրաստանում. նրանք կհասկանան, որ Վրաստանում գերակայում է օրենքը»:
Հիշեցնենք, որ իսրայելցի գործարարներ Ռոնի Ֆուքսն ու Զեև Ֆրենկելը ձերբակալվել էին 2010 թվականի հոկտեմբերի 14-ին Բաթում քաղաքում: Նրանք մեղադրվում էին Վրաստանի ֆինանսների փոխնախարար Ավթանդիլ Խարաիձեին 7 միլիոն դոլար կաշառք տալու մեջ:
Ապրիլի 1-ին Թբիլիսիի դատարանը իսրայելցի գործարարներ Ռոնի Ֆուքսին և Զեև Ֆրենկելին մեղավոր ճանաչեց պաշտոնատար անձին կաշառելու փորձի համար:
Ֆուքսը դատապարտվեց 7 տարվա ազատազրկման և 500.000 վրացական լարի (295.000 ամերիկյան դոլար) տուգանքի, իսկ Զեև Ֆրենկելը` 6.5 տարի ազատազրկման ու 100.000 վրացական լարի (60.000 ամերիկյան դոլար) տուգանքի: