Կրեմլը թերագնահատել է արևմտյան պատժամիջոցների հետևանքները, գրում է Wall Street Journal-ը: Թերթը նշում է, թե Մոսկվան նախապես վստահ էր, որ աշխարհում իններորդ տնտեսությունը կհաղթահարի հակառուսական միջոցառումների տնտեսական հետևանքները, և տարվա մեծ մասը, թվում էր, նախագահ Վլադիմիր Պուտինի նման «դրույքն» արդարացրել էր իրեն: Բացի այդ, Կրեմլը վստահ էր, որ Մոսկվայի խոր առևտրական կապերն անպիսի առևտրական գործընկերների հետ, ինչպիսին Գերմանիան է, կսահմանափակի Արևմուտքի պատժամիջոցների անցանկալի հետևանքները:
Սակայն նման հաշվարկներն արմատապես սխալ դուրս եկան: Ընդլայնված պատժամիջոցները փակեցին Ռուսաստանի հասանելիությունն Արևմտյան կապիտալին և տեխնոլոգիաներին` ռուսական տնտեսությունը դեպի հետընթաց մղելով: Մոսկվայի համար երկրորդ հարվածը նավթի գների անկումն էր, ինչն էլ իր հերթին հանգեցրեց ռուբլու անկմանը:
Պարբերականը նաև ընդգծել է, որ Ուկրաինայի ճգնաժամը Մոսկվայի և Արևմուտքի հարաբերություններում«սառը պատերազմի» ժամանակներից ի վեր «ամենախոր սեպն է խրել»: Դրանից մասնավորապես տուժեցին Ռուսաստանի նախագահի և Գերմանիայի կանցլեր Անգելա Մերկելի հարաբերությունները: Դեռևս մեկ տարի առաջ Մերկելը համարվում էր Պուտինի ամենահուսալի արևմտյան գործընկերներից մեկը:
Պարբերականը նաև գրում է, որ Ուկրաինայի նկատմամբ Պուտինի հռետորաբանությունը վերջին ամիսներին կարծես մեղմացել է: Ինչ վերաբերում է ԱՄՆ նախագահ Բարաք Օբամայի հետ հարաբերություններին` Կրեմլն ըստ երևույթին կորցրել է մերձեցման հույսը:
