Վարչապետ Հովիկ Աբրահամյանը այսօր կառավարության նիստից հետո որոշել է շրջայց կատարել սուպերմարկետներով:
«Առաջին լրատվական»-ի հետ զրույցում Հովիկ Աբրահամյանը նշեց, որ մինչև «Նոր Զովք» սուպերմարկետ այցը եղել է «Սաս» սուպերմարկետում, որտեղ դոլարի փոխարժեքը 460-480 է եղել, արդեն գների անկում կա: «Ճիշտ կլինի, որ մենք ականատես լինենք այդ պրոցեսին, ճիշտը դա է»,- ասաց նա:
Մեր այն դիտարկմանը ի պատասխան, որ նույնիսկ առաջին անհրաժեշտության ապրանքները չեն վաճառվում «Նոր Զովքում», մասնավորապես, երեկ ամբողջ օրվա ընթացքում շաքարավազ սուպերմարկետում չի վաճառվել, վարչապետը նշեց. «Երեկ այո, այսօր՝ ոչ: Երեկ երեկոյան ամեն ինչ կարգավորվել է, և մենք հետամուտ ենք լինելու: Համոզված եմ, որ այս շոկը շատ շուտով կանցնի»:
Մեր այն հարցին՝ հնարավո՞ր է արդյոք դրամի կտրուկ արժեզրկումից և այսօր՝ կտրուկ արժևորումից կայուն վիճակ պահպանել, վարչապետը պաասխանեց. «Այո, համոզված եմ, որ դրամը իր կայուն արժեքը կունենա, և գերարժեզրկված էր մեր դրամը, գերարժևորվել էր դոլարը: Հիմա առաջիկա մեկ-երկու օրերին կկարգավովի»:
«Նոր Զովքում» վարչապետը արձանագրեց երկու փաստ. նախ՝ որ ձուն անհիմն թանկացրել են, և տեղում շտկեց. 82 դրամից ձուն դարձավ 75. «Արտադրողներն անհիմն թանկացրել են, և այդ գնով տալիս են խանութին, որ վաճառի: Արդյունքում վնասում ենք մեր քաղաքացուն: Դա վատ բան է»,- ասաց նա:
«Մարդիկ այսօր դոլար են փոխում 480 դրամով, որ երեկ գնել են 580-ով, և հիմա վնասվել են»,- ասաց վարչապետը:
Նա նշեց, որ երեկ կատարել են անհրաժեշտ քայլեր, փորձել վեր հանել այն բոլոր ատյաններում, որտեղ զբաղվում են սպեկուլյացիայով:
«Համոզված եմ, որ որոշ մարդիկ, անհատներ օգտվեցին այս խառը վիճակից, շոկից և փորձեցին դրամ կորզել ժողովրդից, բայց առավոտից կարգավորվել է այս հարցը»,- ասաց Հովիկ Աբրահամյանը:
Ավելին՝ տեսանյութում:
