Ամերիկացի դերասան Առնոլդ Շվարցենեգերը ներկայացրել է «Երկվորյակների» հաջորդ ֆիլմը: Նա պատասխանել է Reddit կայքից օգտվողների հարցերին, հայտնում է Lenta.ru-ն:
Նրա խոսքով՝ «Երկվորյակներ 2. եռյակը» ֆիլմում իրենից և Դեննի դե Վիտոյից բացի՝ նկարահանվում է նաև Էդդի Մերֆին:
«Երկվորյակները» ֆիլմը պատմում է տարբեր ձվաբջիջներից ծնված երկվորյակների՝ Ջուլիուսի (Շվարցենեգեր) և Վինսենտի (դե Վիտո) մասին, որոնք լույս աշխարհ են եկել իդեալական մարդ ստեղծելու փորձի արդյունքում: Մանուկ հասակում բաժանված լինելով՝ նրանք տարբեր պայմաններում են մեծացել. Ջուլիուսը դարձել է ֆիզիկապես զարգացած ինտելեկտուալ, Վինսենտը մի շարք վնասակար սովորություններ ունի, կապված է քրեական աշխարհի հետ: Իրենց ծնվելուց 35 տարի անց հանդիպելուց հետո նրանք նախ մի շարք ծիծաղելի իրավիճակներում են հայտնվում, հետո փորձում են գտնել իրենց կենսաբանական մորը:
Շվարցենեգերը չի ներկայացրել նախագծի մանրամասները. հայտնի չէ ո՛չ ռեժիսորի անունը, ո՛չ ֆիլմի թողարկման ամսաթիվը:
Դերասանն ասել է, որ իր կյանքի ամենադժվար աշխատանքը եղել է նահանգապետի գործը, ամենահաճելին՝ դերասանությունը, և չնայած ինքը կարոտում է Կալիֆոռնիայի ղեկավարի իր պաշտոնը, այնուամենայնիվ «Հերոսի վերադարձը» ֆիլմում նկարահանվելը նրա համար հրաշալի զբոսանք էր ժամանակի մեջ:
Նա նաև ասել է, որ կուզենար նկարահանվել այնպիսի ռեժիսորների ֆիլմերում ինչպիսիք են՝ Մայքլ Բեյը, Սթիվեն Սփիլբերգը և Սեմ Ռեյմին: Նա ասել է, որ իր մարմնավորած կերպարների ամենակարևոր արտահայտությունը նա համարում է Տերմինատորի I’ll be back խոսքը, իսկ իր վերջին աշխատանքից՝ You fucked up my day-off-ը:
Շվարցենեգերն ասել է, որ Հանրապետական կուսակցությանը, որի անդամ է ինքը, և ընդհանրապես, բոլոր քաղաքական գործիչներին պակասում է համբերատարությունն ու մարդկայնությունը:
