«Առաջին լրատվական»-ի զրուցակիցն է ՀՀԿ խմբակցության ղեկավար Գալուստ Սահակյանը:
Նախկին նախագահ Ռոբերտ Քոչարյանը երեկ հարցազրույց էր տվել լրատվամիջոցներից մեկին, որտեղ, մի քանի ուշագրավ մտքեր էր հայտնել առաջիկա նախագահական ընտրությունների հետ կապված: Երեկ ողջ մամուլն ու քաղաքական դաշտը մեկնաբանում էին նրա երկիմաստ խոսքերը, և մենք փորձեցինք հենց ՀՀԿ խմբակցության ղեկավար Գալուստ Սահակյանից մեկնաբանություն ստանալ այդ հարցազրույցի հետ կապված, նա նույնիսկ չսպասեց, մինչև հարցը հնչեր ու միանգամից սկսեց մեկնաբանել:
– Իհարկե, նյութը կարդացել եմ: Դա երկրորդ նախագահի շատ պարզ, որոշակի կարծիքն է, որի հետ կարելի է համաձայնել, կարելի է քննադատել, կարելի է տողատակերին տարբեր բաներ տեսնել ու տարբեր գնահատականներ տալ: Բայց կարծում եմ, որ դա քաղաքական այս պայմաններում որևէ ազդեցություն չունի, որ վերլուծենք: Առանձնապես այնպիսի բան էլ չի ասել, որ մենք չգիտեինք կամ չենք ասել:
– Եթե նա այնպիսի բան չի ասել, որ Դուք չգիտեք կամ չեք ասել, այդ դեպքում համաձա՞յն եք նրա այն մտքի հետ, որ այս ընտրություններն այնքան էլ մրցակցային չեն, որ «քաղաքական մրցակցությունն ընտրություններից առաջ մի տեսակ տիկնիկային է դարձել, և որ առանց մրցակցության իշխանությունը գուցեև հանգիստ է քնում, բայց ժողովուրդը, որպես կանոն, վատ է ապրում»:
– Դա միայն իր կարծիքը չէ, և նոր կարծիք չէ: Դա մոտ 20 օր է շրջանառության մեջ է դրված: Ես համաձայն չեմ, որ ընտրությունները մրցակցային չեն, որովհետև ներքաղաքական էլիտայի հիմնական դերակատարների 80 տոկոսը մրցապայքարի մեջ են:
– Հիմնական ուժերը պայքարի մեջ չեն՝ ՀԱԿ-ը, ԲՀԿ-ն, ՀՅԴ-ն չեն առաջադրել թեկնածուներ և որևէ թեկնածուի էլ չեն պաշտպանում:
– 80 տոկոս քաղաքական ուժերը և գործիչները, որոնք ճանապարհ են անցել և տեսանելի են հասարակությանը, մասնակցում են:
– Այդ դեպքում, առաջադրված թեկնածուներից ո՞ւմ եք համարում Սերժ Սարգսյանի հիմնական մրցակիցը:
– Ես կարծում եմ, որ դեռ շուտ է այդ մասին խոսել, ժողովուրդը քարոզարշավի ժամանակ ցույց կտա, թե ում է համարում հիմնական մրցակից:
– Ռ. Քոչարյանը նաև մտահոգիչ է համարել Հայաստանի տնտեսության վիճակը և թերահավատորեն է անդրադարձել անցած տարվա 7 տոկոս տնտեսական աճի ցուցանիշին՝ ընդգծելով, որ այն նույնիսկ համադրելի չէ 2008թ. աճի հետ:
– Անցյալ ժամանակների բարվոք տնտեսական իրավիճակում թատերական առաջնաբեմում էլի հանրապետականներն էին: Եթե ամբողջ աշխարհը ֆորս-մաժորային ժամանակաշրջան է ապրում, դա բնականաբար պետք է ազդեցություն ունենա նաև Հայաստանի վրա: Բայց չեմ կարծում, որ դա համեմատելու արգումենտ է, և չեմ էլ կարծում, որ մենք այսօր տնտեսական խնդիրներ չունենք:
– Ռ. Քոչարյանը նաև հատուկ ընդգծել էր, թե չի առաջադրվել նախագահական ընտրություններին, քանի որ իր համար «իշխանության պայքարը երկու ղարաբաղցիների, երկու վաղեմի գործընկերների միջև անընդունելի է»: Նա շեշտո՞ւմ է հայաստանցի-ղարաբաղցի տարբերակումը:
– Հիմա դուք ուզում եք դրակա՞ն, թե՞ բացասական բան ասեմ: Տնավարի խոսք է ասվել: Եվ ես չեմ կարծում, որ ամբողջ քաղաքական դաշտը, այս բոլոր 8 թեկնածուների խնդիրները թողած՝ մենք պիտի փորձենք փնովել կամ գովաբանել երկրորդ նախագահին: Մենք ոչ էլ որևէ մոտեցում ենք ցուցաբերում առաջին նախագահի նկատմամբ: Մենք չենք էլ ուզում մեր ժամանակը վատնել այս կամ այն խոսքը վերլուծելու համար, հարգանքով ենք մոտենում և՚ առաջին նախագահին, և՚ երկրորդ նախագահին:
– Ամեն դեպքում, հայաստանցի-ղարաբաղցի տարբերակումը ՀՀ թե՚ քաղաքական, թե՚ հասարակական շրջանակներում ի հայտ եկավ Ռ. Քոչարյանի՝ Հայաստան գալուց հետո: Չե՞ք կարծում, որ իր այդ հայտարարությամբ նա նորից է ընդգծում դա:
– Համենայնդեպս, Ս. Սարգսյանն այն անձանցից մեկն է, ով այդ խոցելի, անհեթեթ մոտեցումները մեր իրականությունից վերացրեց: Այսօր գոյություն չունի հայաստանցի-ղարաբաղցի տարբերակումը: Ուզում եք Քոչարյանին պաշտպանե՞մ, թե՞ չպաշտպանեմ: Քոչարյանին այսօր մենք կարող ենք ընդամենը հարգել և ոչ թե վերլուծել:
– Ինչո՞ւ եք վերջերս Բրյուսել կատարած այցի ժամանակ Հայաստան հրավիրել Եվրախորհրդում ԵԺԿ խմբակցության ղեկավար Ժոզեֆ Դոլին:
– Որովհետև մեր կուսակցությունը ԵԺԿ-ում դիտորդ անդամ է, նա էլ մեծ խմբակցության ղեկավար է: Հրավերք եմ արել և դրանում շատ դրական բաներ եմ տեսնում: Դա բարեկամական հանդիպում կլինի, կքննարկենք մեր հետագա համագործակցության ծրագրերը:
– Մի քանի տարի առաջ հայտարարել էիք, թե եթե ԵԽ-ում ՀՀ համար ճանապարհները փակ են, ապա կգնանք դեպի իսլամիզմ: Հիմա այդ վտանգն անցե՞լ է:
– Քաղաքական սատիրան դեռևս այստեղ մուտք չի գործել, կարծում եմ, որ ժամանակը կգա, և դրա հիմնադիրներից մեկը ես կլինեմ: Ես սարկազմ եմ արել: Բնականաբար, կարելի է պատմական հեռանկարով ասել՝ եթե այդ ճանապարհը մեր ազգային մենթալիտետին մոտ լիներ, հնարավոր է, որ մենք դարեր շարունակ չլինեինք, և արդեն ապացուցելի կլիներ, որ այդքան կոտորածների չէինք ենթարկվի: Հայ ժողովուրդը, հարգելով ցանկացած կրոն, երբեք իսլամական կրոնի դավանանքը չի կարող ունենալ: Նույնիսկ քրիստոնեության մեջ մենք մեր առաքելական դավանանքը հյուսեցինք, որ առանձնանանք որպես ժողովուրդ, որպես ազգ՝ պահպանելով մեր արմատները:
– Ձեր կարծիքով՝ ԲՀԿ-ի մոտ կես մլն ընտրողները իշխանությա՞ն, թե՞ ընդդիմության թեկնածուին կընտրեն: ԲՀԿ-ի ընտրազանգվածից Ս. Սարգսյանին ձայներ բերելու համար աշխատելո՞ւ եք այդ կուսակցության տարածքային պաշտոնյաների հետ:
– Ես կարծում եմ, որ ԲՀԿ ձայների 50 տոկոսից ավելին իշխանական էին, որովհետև այդ կուսակցությունը կոալիցիայի անդամ էր: Եվ խորհրդարանական ընտրություններում մենք հակադրություններ չունեցանք ԲՀԿ հետ: Կարծում եմ, որ ԲՀԿ-ից կլինեն պաշտպանողներ, պասսիվներ և ցուցադրողներ: Այնպես որ, մեր բազան այդտեղ չենք տեսնում: Իհարկե, ընտրություններն այնպիսի բան են, որ բոլորի հետ էլ փորձելու ենք, ՀԱԿ-ի վրա էլ պիտի աշխատենք, ԲՀԿ-ի վրա էլ, մյուսների վրա էլ: Բա քարոզչությունը դրա համար է:
– Իսկ կդիմե՞ք ԲՀԿ ղեկավար Գագիկ Ծառուկյանին, որ նա իր ընտրողներին հորդորի ընտրել Ս. Սարգսյանին:
– Ճիշտն ասած, այս տարիների ընթացքում եթե որևէ փոխհարաբերություններ են եղել, դրա առաջարկը եղել է այլ կուսակցության կողմից: Մենք էստի համեցեք կուսակցություն չենք եղել:
