ԱՄՆ Կոնգրեսի սենատը ուրբաթ օրն ընդունել է օրինագիծ՝ 2015 ֆինանսական տարվա ռազմական կարիքների համար 577 մլրդ դոլար հատկացնելու մասին: Այս մասին գրում է TASS-ը:
Կոնգրեսի ներկայացուցիչների պալատն արդեն այդ փաստաթղթին հավանություն էր տվել դեկտեմբերի 4-ին: Դա նշանակում է, որ այժմ այն կուղարկվի նախագահ Բարաք Օբամային՝ ստորագրելու:
Կոնգրեսի երկու պալատներով անցած այդ օրինագիծը հավանություն է տվել ԱՄՆ վարչակազմի հարցմանը՝ արտասահմանում ԴԱԻՇ («Իրաքի և Շամի իսլամական պետություն») ահաբեկչական խմբավորման դեմ ռազմական ուժ կիրառելու մասին: Ըստ այդմ՝ 1.5 հազար ամերիկացի զինծառայողներ կմասնակցեն արտասահմանում ԴԱԻՇ-ի դեմ պայքարի արշավին:
Բացի այդ, օրինագիծը թույլ է տալիս երկարաձգել սիրիական ընդդիմության գրոհայիններին ուսուցանելու և զինելու վարչակազմի մանդատը: Պենտագոնի այս լիազորությունները որոշվել է երկարաձգել 2 տարով:
Օրինագծով նախատեսվում է Պենտագոնի բյուջեին և ԱՄՆ էներգետիկայի նախարարության ռազմական ծրագրերին հատկացնել 514 մլն դոլար: Եվս 63.7 մլրդ դոլար կհատկացվի Աֆղանստանում, Իրաքում և Սիրիայում ռազմական գործողությունների համար: