Հայ ազգային կոնգրեսը թերահավատությամբ է վերաբերվում իշխանությունների կողմից իր հասցեին ուղղված հայտարարությունների անկեղծությանը:
Կոնգրեսի անդամ ԺՀԿ նախագահ Պետրոս Մակեյանը, մեկնաբանելով ՀՀԿ փոխնախագահ Ռազմիկ Զոհրաբյանի` այսօրվա հայտարարությունները, թե Կոնգրեսը բավական հզոր ուժ է, ասաց, թե իշխանությունները սարսափած են, որ առաջիկա հանրահավաքին շատ մարդ կլինի:
«Իրենց իսկ պահվածքով, ընդդիմության մասին դրական խոսքեր հնչեցնելով փորձում են ժողովրդին հիասթափեցնել, որ ավելի քիչ մարդ մասնակցի հանրահավաքին: Ավելին` իրենց գործակալների միջոցով փորձում են լուրեր տարածել, թե իբր Կոնգրեսը կապի, պայմանավորվածությունների մեջ է իշխանությունների հետ: Այլ բացատրություն չունի իրենց պահվածքը: Սա հատուկ ծառայությունների գործելաոճ է` վարկաբեկելու համար ընդդիմությանը»,- ասաց պարոն Մակեյանը:
Ըստ Մակեյանի, սակայն, այդ գաղափարախոսության հեղինակների փորձերը կձախողվեն: «Շատ քիչ թվով մարդկանց վրա միգուցե ազդեցություն թողնի իշխանությունների գործելաոճը, բայց կարծում եմ, հաջորդ հանրահավաքը, միեւնույն է, շատ ավելի մարդաշատ է լինելու: Իշխանությունները չեն կարող իրենց ապահով զգալ»,- վստահեցրեց պարոն Մակեյանը: