Թուրքական Doğan լրատվական գործակալության փոխանցմամբ, «Ազգայնական շարժում» կուսակցության նախագահ Դևլեթ Բահչելին, Աֆյոնքարահիսար նահանգի Էմիրդաղ շրջանում ելույթ ունենալով իր ապագա ընտրողների առջև, սուր քննադատության է ենթարկել կառավարությանն ու վարչապետ Ռեջեփ Թայյիփ Էրդողանին.
«2010 թվականի սեպտեմբերի 12-ին Թուրքիայում տեղի ունեցած սահմանադրական բարեփոխումների հանրաքվեից հետո Էրդողանը շնորհակալություն հայտնեց «օվկիանոսից այն կողմին»: Էրդողանի վարած քաղաքականությունից զգացվում է, որ նա Մերձավոր Արևելքում սուլթան է, Թուրքիայում` փադիշահ, իսկ ահա օվկիանոսից այն կողմում` ծառա: Անհրաժեշտ է կանգնեցնել այս ամենը: Դրա լավագույն միջոցը հունիսի 12-ին կայանալիք խորհրդարանական ընտրություններն են, որոնց արդյունքում վերջ կտրվի այս իշխանությունների կառավարմանը»:
Հիշեցնենք, որ երբ նախորդ տարվա նոյեմբերի վերջին Էրդողանն այցելեց Լիբանան, Բեյրութի բնակիչները նրան դիմավորեցին «Բարի գալուստ սուլթան» կոչերով:
2010 թվականի հոկտեմբերի կեսերին էլ բժշկական գիտությունների պրոֆեսոր, հոգեբան, քաղաքական գործիչ և մարդու իրավունքների պաշտպան Մեհմեթ Բեքարօղլուն, վկայակոչելով վերջին տարիներին Էրդողանի վարած իսլամական քաղաքականությունը, հայտարարել էր, թե Էրդողանն իրեն համարում է սուլթան Աբդուլ Համիդ 3-րդ: Չպետք է մոռանալ, որ հայ ժողովրդի դահիճ, Օսմանյան կայսրության 34-րդ սուլթան Աբդուլ Համիդ 2-րդը հանդիսացել է պանիսլամիզմի (համաիսլամականության) ջերմ ջատագով:
Ի դեպ, ներկայումս Էրդողանին նաև հաճախ համեմատում են Թուրքիայի Հանրապետության հիմնադիր Մուսթաֆա Քեմալ Աթաթուրքի հետ` նկատի ունենալով Թուրքիայի համար նրանց փրկչի դերը:
Նշվում է, որ 2002 թվականին Թուրքիայում Էրդողանի գլխավորած «Արդարություն ու զարգացում» կուսակցության իշխանության գլուխ գալուց առաջ` 2001 թվականին, Թուրքիան գտնվում էր շատ ծանր իրավիճակում: Դա, մասնավորապես, վերաբերում է նրա տնտեսությունը:
Մինչդեռ այժմ Թուրքիայի տնտեսությունը Եվրոպայի ամենաարագ զարգացող տնտեսությունն է (ինչի համար էլ Թուրքիային անվանում են «Եվրոպայի Չինաստան»): 2001 թվականն էլ համեմատում են Օսմանյան կայսրության անկման ժամանակաշրջանի հետ, երբ Քեմալ Աթաթուրքին հաջողվեց Օսմանյան կայսրության մոխիրներից վեր հանել ներկայիս Թուրքիայի Հանրապետությունը:
