ՀՀ ԱԺ փոխնախագահ Էդուարդ Շարմազանովը դեկտեմբերի 10-ին հանդիպել է Հայաստանում Չինաստանի արտակարգ եւ լիազոր նորանշանակ դեսպան Թիան Էրլունի հետ:
ԱԺ փոխնախագահը շնորհավորել է Թիան Էրլունին Հայաստանում դիվանագիտական առաքելությունը սկսելու կապակցությամբ և հույս հայտնել, որ դեսպանի գործունեությունը նպաստավոր կլինի հայ-չինական ավանդական համագործակցության առավել խորացման և զարգացման համար: Պարոն Շարմազանովը կարևորել է միջխորհրդարանական կապերի սերտացումն ու զարգացումը, պատգամավորական բարեկամական խմբերի գործունեությունը: Նրա գնահատմամբ՝ տարբեր ոլորտներում համագործակցության մեծ ներուժ կա, որը պետք է արդյունավետ օգտագործվի:
Էդուարդ Շարմազանովը, անդրադառնալով ԼՂ հակամարտությանը, ընդգծել է, որ ՀՀ իշխանությունները հավատարիմ են խնդիրը բացառապես խաղաղ ճանապարհով լուծելու սկզբունքին և դրական է գնահատել Չինաստանի իշխանությունների հավասարակշիռ դիրքորոշումն այս հարցում:
Դեսպան Թիան Էրլունը, շեշտելով, որ տպավորված է հայ-չինական համագործակցության բարձր մակարդակով, պատրաստակամություն է հայտնել ձեռնարկելու անհրաժեշտ քայլեր՝ փոխադարձ համագործակցության նոր մակարդակ ապահովելու և միջպետական ու միջխորհրդարանական կապերն առավել զարգացնելու համար: Նա ընդգծել է, որ Չինաստանը ԼՂ հակամարտության կարգավորումը տեսնում է բացառապես խաղաղ ճանապարհով, Մինսկի խմբի ձևաչափով:
Հանդիպման ընթացքում զրուցակիցներն անդրադարձել են նաև տնտեսական, կրթական, մշակութային, հումանիտար և այլ ոլորտներում համագործակցության հեռանկարներին: Կողմերը կարևորել են բարեկամ երկրների խորհրդարանների միջև փորձի փոխանակումը և փոխայցելությունները: