Վրաստանն աջակցել և աջակցում է Ադրբեջանի տարածքային ամբողջականությանը: Այս մասին ադրբեջանական APA գործակալությանը հայտնել են Բաքվում Վրաստանի դեսպանատնից՝ մեկնաբանելով Վրաստանի արտգործնախարար Մայա Պանջիկիձեի հայտարարությունը Լեռնային Ղարաբաղի մասին:
«Վրաստանն աջակցել և աջակցում է Ադրբեջանի տարածքային ամբողջականությանը, մենք միշտ սատարել ենք միմյանց ՄԱԿ-ում և այլ միջազգային կազմակերպությունների շրջանակներում. դա մեր պաշտոնական դիրքորոշումն է »,-հայտարարել են դեսպանատանը:
Ավելի վաղ ԶԼՄ-երում տեղեկություն էր տարածվել այն մասին, որ Պանջիկիձեն, Լատվիայում խոսելով Ղարաբաղյան հակամարտության մասին, հայտարարել էր, որ հակամարտությունը կարելի է կարգավորել միայն «հօգուտ Ադրբեջանի տարածքային ամբողջականության»: Վրաստանի խորհրդարանական փոքրամասնության ներկայացուցիչներն իրենց բողոքն են արտատահայտել այս կապակցությամբ և պահանջում են արտգործնախարարի հրաժարականը:
Նշենք, որ Վրաստանի վարչապետ Բիձինա Իվանիշվիլին չի մեկնաբանել Պանջիկիձեի հայտարարությունը և նշել է, որ արտգործնախարարն անձամբ մեկնաբանություն կտա այդ հարցի շուրջ:
