Չկա Սերժի և Րաֆֆիի Հայաստան, կա Հայաստան, որտեղ ժողովուրդն իշխանություն ձևավորելու հնարավորությունից զրկված է. այսօր լրագրողների հետ հանդիպման ժամանակ այս մասին ասաց ԼՂ նախկին արտգործնախարար, ՀՀ նախագահի թեկնածու Արման Մելիքյանը՝ անդրադառնալով ՀՀ նախագահի թեկնածու Րաֆֆի Հովհաննիսյանի դիտարկմանը, թե փետրվարի 18-ին լինելու է Սերժի և Րաֆֆիի Հայաստանների պայքարը:
Նա հստակեցրեց, որ չկա Սերժի և Րաֆֆիի Հայաստան, կա Հայաստան, որտեղ ժողովուրդն իշխանություն ձևավորելու հնարավորությունից զրկված է, նախագահը նշանակված է, խորհրդարանական ուժերը գործարքով են խորհրդարան մտել: Արման Մելիքյանի գնահատմամբ՝ սա տխուր իրողություն է, որ այսօր մենք վերջնագծին ենք հասել:
«Սրանից հիմնական տուժողը հասարակությունն է, որը եթե իրեն պաշտպանելու միջոցներ չձեռնարկի, մենք կունենանք քաղաքական մենաշնորհով և տխուր ապագայով պետություն: Այս է պատճառը, որ որոշեցի առաջադրվել և առաջարկել նոր օրակարգ»,- նշեց ՀՀ նախագահի թեկնածուն:
Աման Մելիքյանը նշեց, որ քաղաքական դաշտում ստեղծված իրավիճակը կանխատեսելի էր՝ ասպարեզում հայտնվեցին այն մարդիկ, որոնց կարող ենք գնահատել ՀՀ քաղաքական դաշտի երկրորդ էշելոնի ներկայացուցիչներ՝ կուսակցապետեր: «Առաջադրվողներից որևէ մեկը չի առաջարկել ընտրություններում հաղթելու իրական որևէ սցենար, մենք պատրաստել ենք այդ սցենարը»,- տեղեկացրեց նա:
