ԱՄՆ Կոնգրեսը պետք է բարձրացնի պետպարտքի վերին թույլատրելի շեմը՝ խուսափելու համար կառավարության ֆինանսական պարտավորություններին սպառնացող դեֆոլտից: Նման հայտարարություն է արել ԱՄՆ Արժույթի դաշնային պահուստի ղեկավար Բեն Բեռնանկեն՝ Միչիգանի համալսարանում ունեցած ելույթի ժամանակ: Այս մասին հայտնում է Reuters գործակալությունը:
Բեռնանկեն նշել է, որ պետպարտքի բարձրացման օրենսդրական միջոցառումները նոր դեֆիցիտ և նոր ծախսեր չեն առաջացնի:
Նա հավելել է, որ պետպարտքի շեմի բարձրացումը խորհրդանշական է, և որ աշխարհում ոչ մի այլ երկիր չունի նման սահմանափակում:
Բեռնանկեն քննադատել է մեկ տրիլիոն դոլարի մետաղադրամների թողարկման գաղափարը: «Մենք չենք կարծում, որ դա խնդրի լուծման ճիշտ միջոց է: Կան օրենսդրական, քաղաքական հարցեր: Կարծում եմ` այդ խնդրի լուծման ճիշտ միջոցն այն է, որ Կոնգրեսն անի այն, ինչ պետք է անի»,- հայտարարել է նա:
