Քենթրբերիի արքեպիսկոպոս Ջասթին Ուելբին հայտարարել է, որ ցնցված է Մեծ Բրիտանիայում սովից ավելի, քան աֆրիկական փախստականների ճամբարներում տիրող իրավիճակից: Այս մասին հաղորդում է The Mirror պարբերականը:
«Դա սարսափեցնող է, բայց որքան էլ ցավալի է՝ սպասելի իրավիճակ է: Մի քանի շաբաթ առաջ ես Անգլիայի սննդի բանկում զրուցում էի մարդկանց հետ՝ կնոջ, տղամարդու և նրանց երեխայի: Նրանք ամաչում էին, որ գտնվում են այնտեղ: Հայրը ճնշված էր: Նա պատմում էր, որ ինքը և կինը շաբաթը մեկ անգամ ստիպված են եղել հրաժարվել իրենց ընթրիքից, որպեսզի երեխային ավելի շատ սնունդ հասնի»,- նշել է հոգևորականը:
Արքեպիսկոպոսը կոչ է արել կատարել բարեփոխումներ, որ պարենամթերքի ընկերություններին հնարավորություն կտային հանձնել այն ապրանքները, որոնք այլևս հնարավոր չէ վաճառել:
