Վրաստանի նախկին նախագահ Էդուարդ Շեվարդնաձեն կարծում է, որ Միխաիլ Սաակաշվիլիի՝ նախագահի պաշտոնում մնալն իմաստ չունի, քանի որ նա կորցնում է պետության մեջ և իր շրջապատում վերահսկողությունը, փոխանցում է «Интерфакс-Украина»-ն:
«Ինչ իմաստ ունի նախագահ լինել, եթե քո շրջապատը քեզ չի աջակցում և ամենագլխավորը՝ քո ազգը քեզ չի ընդունում: Եվ եթե նա խիղճ ունենա, կհեռանա պաշտոնից»,- հայտարարել է Շեվարդնաձեն վրացական «Ասավալ-դասավալի» հրատարակչությանը տրված հարցազրույցում:
Միաժամանակ նա կարծում է, որ Սաակաշվիլին «հիմա հատկապես վտանգավոր է, քանի որ նրա բոլոր գործողությունները թելադրված են վարչապետ Իվանիշվիլիի հանդեպ տածած ատելությամբ»:
«Վերջերս ԶԼՄ-ները տարածել են 2003թ-ին իմ տված հարցազրույցներից մեկը, որտեղ ես Սաակաշվիլուն շատ վտանգավոր անձնավորություն եմ անվանել: Ինչպես տեսնում եք, ես չեմ սխալվել»,- հիշեցրել է Շեվարդնաձեն:
Հարցազրույցում նա նշել է նաև, որ որպես իրեն փոխարինող էր տեսնում Զուրաբ Ժվանիային, այլ ոչ թե Սաակաշվիլուն: