Թողարկվել է Ռոման Կոպոլայի նոր ֆիլմի թրեյլերը՝ «Չարլզ Սվոն Երրորդի ապշեցուցիչ ֆանտազիաները», որտեղ գլխավոր հերոսի դերում հանդես է գալիս Չառլի Շինը:
Դերասանը մարմնավորում է հաջողակ գրաֆիկական դիզայներ Չարլզ Սվոնին, որը կորցնում է փառքը, փողերն ու հմայքը և խզելով հարաբերություններն ընկերուհու հետ` սկսում է անկում ապրել:
Նրա ընկերները՝ Կիրբին (Ջեյսոն Շվարցման) ու Սոլը (Բիլ Մյուրյ), ինչպես նաև քույրը (Պատրիսիա Արկետ) փորձում են օգնել նրան` բաժանումից հետո հաղթահարելու դժվարությունները:
Թրեյլերում չկան օրիգինալ կադրեր ֆիլմից, այն շոուի ոգով անիմացիոն կոլաժ է: Շինը հանում է գլխարկը ու այդտեղից դուրս են թռչում մի շարք կերպարներ, որոնք ցույց են տալիս, թե իրականում ինչի մասին է մտածում նրա հերոսը: Դրանք հիմնականում կանայք են:
Ռոման Կոպոլան Ֆրենսիս Ֆորդ Կոպոլայի որդին է ու Սոֆյա Կոպոլայի եղբայրը: Հայտնի տեսահոլովակներ նկարահանողը մեկ անգամ չէ, որ մասնակցել է ֆիլմերի նկարահանումների, եղել է Ուես Անդերսոնի «Լիակատար լուսնի թագավորություն» ու «Ջարջիլինգի գնացքը» ֆիլմերի սցենարների համահեղինակը: Նրա դեբյուտը կինոյում կայացել է 2001 թվականին` CQ ֆիլմով:
«Ֆանտազիաները» Ռոման Կոպոլայի` որպես ռեժիսոր, նկարահանած երկրորդ ֆիլմն է:
