Մեր հարցերին պատասխանում է ԱԺ ՀՀԿ խմբակցության պատգամավոր Մանվել Բադեյանը:
– Պարոն Բադեյան, Ձեր կարծիքով՝ ինչո՞ւ է արժեզրկվում դրամը, և այդ արժեզրկումը մինչև ե՞րբ կշարունակվի:
– Ռուսաստանի նկատմամբ Արևմուտքի կիրառած պատժամիջոցների արդյունքում դոլարի զանգվածը Հայաստանում նվազել է: Հիմա մեր հայրենակիցները դժվարանում են այդ երկրից տրանսֆերտներ ուղարկել, որովհետև ռուսական ռուբլու կուրսը նույնպես կտրուկ անկում է ապրում: Դոլարային զանգվածը պակասել է, ուստիև այն պետք է թանկանա: Իսկ թե ինչքան դա կշարունակվի, թե Արևմուտքի այդ պատժամիջոցներն ինչ անդրադարձ կունենան ՌԴ-ի վրա, և ինչ միջոցներ կձեռնարկի ՌԴ կառավարությունն ու Կենտրոնական բանկը, շատ դժվար է կանխատեսել: Բայց խնդիրն ավելի խորքային է: Նույնիսկ կառավարության կամ ԿԲ-ի միջամտության պայմաններում որոշիչը տնտեսության վիճակն է: Ցավոք, ՌԴ տնտեսությունը հիմա անկման փուլում է, և հայտնի չէ, թե երբ այդ փուլից դուրս կգա:
– Իսկ վերջին շրջանում Հայատանում տեղի ունեցող այս թանկացումներն օրինաչա՞փ են, թե՞ սպեկուլյատիվ երևույթներ էլ կան:
– Սպեկուլյացիաներ էլ կլինեն անպայման, որովհետև անկայունության պայմաններում միշտ նման բաներ ծնվում են: Այստեղ արդեն մեր իշխանությունների անելիքը կա: Դա տնտեսական մրցակցությունը պաշտպանող պետական հանձնաժողովի վարքագիծն է, որը պետք է որոշակի կարգավորիչ դեր ունենա: Բայց ամենից առաջ դա կախված է մեր տնտեսության վիճակից, թե մենք որքան դոլարաբեր էքսպորտ կարող ենք արտադրել:
– Իսկ որքա՞ն դոլարաբեր էքսպորտ է այսօր արտադրվում Հայաստանում:
-Այնքան, որքան հիմա արտադրում ենք: Դրա աճի միտումները կան: Ցավոք, տնտեսության մեջ հրաշքներ տեղի չեն ունենում, բայց այսօրվա իրավիճակն ինքնին խթան է հանդիսանում, որ մենք կարողանանք այդպիսի արտադրություններ կամ ծառայություններ կազմակերպել, որ Հայաստան դոլար և եվրո մուտքն ավելացնենք:
– Ձեր կարծիքով, այսօրվա վիճակը հնարավորինս կարգավորելու համար ի՞նչ պետք է անեն իշխանությունները:
– Տնտեսությունը զարգացնեն: Բոլոր հարցերի պատասխանը տալիս է զարգացած տնտեսությունը:
– Զարգացնո՞ւմ են:
– Ցանկացած երկրում ցանկացած ժամանակաշրջանում ցանկացած իշխանության պահվածքը միշտ քննադատելի է, բայց, այնուամենայնիվ, մեր իշխանությունները տնտեսության զարգացման առաջնահերթությունները նախատեսել են, և մենք այդ ուղղությամբ զարգանում ենք:
– Իսկ մեր արտադրության ու արտահանման ծավալը նկատի ունենալով՝ կարո՞ղ ենք ասել, որ դրամն էլի կարժեզրկվի:
– Եթե դոլարային զանգվածը պակասի, իհարկե, կարժեզրկվի: Ավելանալու երկու ձև կա. մեկը տրանսֆերտներն են, որ մենք ստանում էինք Ռուսաստանից, մյուսն էլ արտահանումն է:
