Պակիստանցի քարոզիչ Տախիրուլ Կվադրին կազմակերպել է երթ դեպի Իսլամաբադ՝ պահանջելով ընտրությունների նախօրեին անցկացնել առանցքային բարեփոխումներ:
Ինչպես հաղորդում է «Ալ-Ջազիրա» հեռուստաալիքը, երթը մեկնարկել է հունվարի 13-ին` Լահոր քաղաքից: Երթին արդեն միացել է 7000 մարդ, որոնք ճանապարհ են ընկել հարյուրավոր ավտոմեքենաներով, ավտոբուսներով ու բեռնատարներով:
Ենթադրվում է, որ մինչև Իսլամաբադ հասնելը երթին կմիանան նոր մարդիկ:
Երթի մասնակիցները իրենց հետ տանում են Պակիստանի ազգային դրոշը, ինչպես նաև դագաղի մանրակերտ, որը մարմնավորում է պետական համակարգը:
Անձամբ ինքը՝ իսլամ գիտնական ու քարոզիչԿվադրին, որը բազմաթիվ տարիներ անցկացրել է Կանադայում, Պակիստան է վերադարձել 2012թ. ու հայտարարել, որ մտադիր է գլխավորել միլիոն մարդու՝ դեպի «խաղաղ հեղափոխություն»:
Կվադրին պակիստանյան կառավարությանը մեղադրում է կոռումպացված և ոչ կոմպետենտ լինելու մեջ ու պնդում է, որ երկրի ընտրական համակարգը պետք է բարեփոխվի մինչև ընտրությունները:
Պակիստանում նախատեսվում է ընտրությունները անցկացնել 7 շաբաթվա ընթացքում, խորհրդարանի ցրումից հետո` 2013թ. մարտի կեսին:
