Հյուսիսային Կորեայի իշխանությունները զբոսաշրջային պորտալ են թողարկել օտարերկրացի զբոսաշրջիկների համար, գրում է The Telegraph-ը: Թերթը նշում է, որ նախագիծը կյանքի է կոչվել՝ չնայած Հյուսիսային Կորեայի սահմանները նախկինի պես փակ են: Նշվում է նաև, որ կայքում կոնտենտի մեծ մասը կորեերեն է, ոչ թե անգլերեն:
DprkToday.com-ի այցելուները կկարողանան իմանալ երկրի տեսարժան վայրերի և հյուրանոցների մասին: Բացի դրանից՝ պորտալում պատկերների «մի քիչ տարօրինակ» հավաքածու կա, գրում է պարբերականը: Պոտենցիալ զբոսաշրջիկներին առաջարկում են ծանոթանալ զբոսաշրջային երթուղիներին, տարբեր թեմաներով խորհուրդներ են առաջարկում, այդ թվում՝ անցագիր ստանալու վերաբերյալ:
Կայքում տեղադրված տեսանյութի համաձայն՝ պորտալը ստեղծվել է Արևմուտքի կողմից Հյուսիսային Կորեայի նկատմամբ աճող հետաքրքրությունը բավարարելու համար: Հոլովակում երևում են նաև հյուսիսկորեացի ֆուտբոլիստներ և ատլետներ, դահուկորդներ Masikryong հանգստավայրում, «արևմուտքի հիացած մարդկանց» առջև ջրից վեր ցատկող դելֆիններ, «Արիրան» զանգվածային խաղերի մասնակիցները և հրթիռի արձակում:
