Հյուսիս-Հարավ ավտոմայրուղին շատ կարևոր է ՀՀ-ի համար, առավել ևս, որ Հայաստանում ընդհանրապես նորմալ միջազգային չափանիշներին համապատասխան ավտոճանապարհ չկա և դա առաջինն է լինելու: Նման տեսակետ «Առաջին լրատվական»-ի հետ զրույցում հայտնեց նախկին պատգամավոր, ՀԱԿ անդամ Երջանիկ Աբգարյանը:
«Այդ ճանապարհի կառուցումը Հայաստանի շահերից է բխում, անտարակույս»,- ասաց նա՝ հավելելով, որ պետք է արագ կառուցել ավտոմայրուղին:
Անդրադառնալով ավտոմայրուղու տնտեսապես արդյունավետության հարցին՝ Ե. Աբգարյանը նշեց, որ այդ առումով որոշակի խնդիրներ գոյություն ունեն. «Դա ի վերջո շահավետ կլինի միայն այն դեպքում, երբ Ռուսաստանն իր ապրանքները դեպի հարավ ուղղի Հայաստանի վրայով: Հարցն այն է, որ Ռուսաստանն այլ ուղիներ է որոնում, երկաթուղային ուղի է հարթում դեպի Իրան՝ Ադրբեջանի տարածքով: Տնտեսական արդյունավետություն դա շուտ չի բերի, ուղղակի պետք է հույս ունենալ, որ Ղարաբաղի հարցը կկարգավորվի մինչև ճանապարհի շինարարության ավարտը: Ամեն դեպքում չի կարելի բացասական մոտենալ այդ հարցին»:
Հիշեցնենք, որ Հյուսիս-Հարավ ճանապարհային միջանցքի ներդրումային ծրագրի արժեքը 962 մլն դոլար է, որից 500 միլիոնը, որպես վարկ, տրամադրում է Ասիական զարգացման բանկը: Բետոնե ծածկույթով արագընթաց մայրուղին ձգվելու է Հայաստանի և Իրանի սահմանից` Մեղրիից մինչև Հայաստանի և Վրաստանի սահմանային Բավրա անցակետը և ունենալու է 556 կմ երկարություն:
