Եգիպտոսի մայրաքաղաքում արտաքին գործերի նախարարների մակարդակով սկսվել է Սիրիայի փախստականների հարցերով Արաբական երկրների լիգայի խորհրդի արտակարգ նիստը: Այն հրավիրվել է Լիբանանի պահանջով, որը սահմանակից է Սիրիային, որտեղ ամեն օր հարյուրավոր սիրիացի փախստականներ են գնում:
Նիստը բացել է Լիգայի գլխավոր քարտուղար Նաբիլ Ալ-Արաբին, որն ասել է. «Առաջիկայում պետք է սպասել Սիրիայից ավելի մեծ թվով փախստականների մուտք հարևան երկրներ, և Լիգան պետք է արտակարգ միջոցներ ձեռնարկի՝ կանխելու հնարավոր մարդասիրական օգնության հետ կապված խնդիրները»:
Լիգայի շտաբ կայանի հաղորդագրության համաձայն՝ բացի փախստականներին Սիրիայում և հարևան երկրներում` Լիբանանում, Հորդանանում և Իրաքում տեղավորելու խնդրից, Արաբական երկրների լիգան նիստում կքննարկի նաև սիրիական խնդրի քաղաքական կողմերը: Փակ նիստի ժամանակ արաբական երկրների ԱԳ ղեկավարները կվերանայեն ՌԴ-ի, ԱՄՆ-ի և ՄԱԿ-ում ու Արաբական երկրների լիգայում Սիրիայի հարցով հատուկ բանագնաց Լախդար Բրահիմիի կողմից վերջերս ներկայացված ժնևյան բանակցությունների արդյունքները:
Լիգայի անդամները քննարկելու են նաև երկրում խնդիրը լուծելու՝ Սիրիայի նախագահ Բաշար Ասադի ներկայացրած վերջին առաջարկը: Տեղեկատվության համաձայն՝ արաբական երկրների նախարարները պատրաստ են հաստատելու Արաբական երկրների լիգայի այն դիրքորոշումը, ըստ որի՝ սիրական հակամարտության լուծման միակ հնարավոր տարբերակը Ասադի` նախագահի պաշտոնից հեռանալն է, որն էլ թույլ կտա խաղաղ ճանապարհով հասնել հարցի լուծմանը:
Շտաբ կայանի հաղորդագրության համաձայն՝ դռնփակ նիստի ժամանակ քննարկվելու է նաև Մերձավոր Արևելքը միջուկային զենքից ազատ գոտու վերածելու՝ ՄԱԿ-ի համաժողովի վերաբերյալ ընդհանուր մոտեցումները, որ նախատեսված էին 2012-ի վերջերին: Նախարարների կարծիքով՝ Համաժողովի հետաձգումը Իսրայելի խնդրանքով է եղել և չի համաձայնեցվել տարածաշրջանի այլ երկրների հետ, և դա պահանջում է արաբական երկրների կողմից համապատասխան արձագանք անհիմն որոշման նկատմամբ:
