Ռուսաստանը չի կարող ներկա պայմաններում շարունակել «Հարավային հոսք» նախագիծի իրագործումը: Այս մասին, ինչպես հաղորդում է RIA Novost-ն, հայտարարել է Ռուսաստանի նախագահ Վլադիմիր Պուտինը Թուրքիայի նախագահ Ռեջեփ Թայիփ Էրդողանի հետ հանդիպումից հետո հրավիրված մամուլի ասուլիսին:
«Հաշվի առնելով, որ մենք մինչ այժմ թույլտվություն չենք ստացել Բուլղարիայից, մենք կարծում ենք, որ Ռուսաստանն այս պայմաններում չի կարող շարունակել տվյալ նախագծի իրագործումը,- ասել է Պուտինը:- Սկսել շինարարությունը ծովում, մոտենալ Բուլղարիայի ափերին և կանգ առնել՝ պարզապես անհեթեթություն է»:
Ավելի վաղ Բուլղարիայի կառավարությունը որոշում էր կայացրել դադարեցնել նախագծի իրագործումն իր տարածքում: Իտալիան նույնպես հայտարարել է, որ «Հարավային հոսքն» այլևս իր համար առաջնահերթություն չէ:
«Եթե Բուլղարիան զրկված է իրեն որպես ինքնիշխան պետություն դրսևորելու հնարավորությունից, ապա թող գոնե փորձի գումար պահանջել Եվրահանձնաժողովից կորցրած շահի համար, քանի որ Բուլղարիայի բյուժջեի միայն ուղղակի եկամուտները կկազմեին տարեկան առնվազն 400 մլն եվրո»,- ասել է Պուտինը:
