Սլովենիայի «Քաղաքացիական ցուցակ» կուսակցությունը, որը մտնում է իշխող կոալիցիայի մեջ, սպառնացել է լքել պահպանողական կառավարությունը, եթե վարչապետ Յանեզ Յանշան հրաժարական չտա: Եթե դա պատահի, կառավարությունը կզրկվի խորհրդարանում մեծամասնությունից, որտեղ «Քաղաքացիական ցուցակը» 7 տեղ ունի:
Ինչպես հաղորդում է Reuters գործակալությունը, իր հայտարարությամբ «Քաղաքացիական ցուցակը» կոչ է արել Դեմոկրատական կուսակցությանը, որի ղեկավարն է Յանշան, վարչապետի պաշտոնում նոր թեկնածու ընտրել:
Նշենք, որ Սլովենիան հունվարի 8-ից, երբ երկրի հակակոռուպցիոն հանձնաժողովը վարչապետին մեղադրեց, որ նա չի կարողանում բացատրել իր եկամուտների մի մասի աղբյուրը, հայտնվել է քաղաքական ճգնաժամի մեջ: Հունվարի 11-ին ավելի քան 5000 մարդ դուրս էր եկել Լյուբլյանայի փողոցներ՝ պահանջելով վարչապետի հրաժարականը:
Յանշան հերքում է, որ միջոցները ստացվել են կասկածելի աղբյուրներից:
