Տնտեսական մրցակցության պաշտպանության պետական հանձնաժողովի նախագահ Արտակ Շաբոյանի խոսքով՝ վերջին օրերի իրենց ուսումնասիրությունները պարզել են, որ դոլարի գնի բարձրացմանը զուգահեռ իրականացված թանկացումները հիմնականում համարժեք են: «Մենք պարբերաբար դիտանցումներ ենք իրականացնում այն ապրանքային շուկաներում, որոնցում կան խոշոր տնտեսվարողներ, որպեսզի թույլ չտանք, որ խոշոր ընկերությունները գնային չարաշահումներ իրականացնեն, բայց մեր վերջին դիտանցման ժամանակ պարզվել է, որ ներմուծված որոշ ապրանքների մասով տեղի են ունեցել գնային բարձրացումներ, բայց երբ մենք նայում ենք գնային բարձրացումը և համեմատում ենք փոխարժեքի հետ, տեսնում ենք, որ գնային բարձրացումները հիմնականում համահունչ են»,- այսօր լրագրողների հետ զրույցում ասաց ՏՄՊՊՀ նախագահը՝ հավելելով, որ, ամեն դեպքում, իրենց մասնագետները շարունակում են ուսումնասիրությունները և գնագոյացման հաշվարկները, որպեսզի պարզեն, թե գնային բարձրացումները որքանով են համապատասխան:
Շաբոյանը հերքեց նաև կաթնամթերքի գնի բարձրացման լուրերը, այն դեպքում, որ կաթնամթերք արտադրող ընկերություններից մեկն ինքն էր հայտարարել, որ փոխարժեքի բարձրացման պատճառով իրենք գնային վերանայումներ են արել:
«Առաջին լրատվական»-ը Շաբոյանից հետաքրքրվեց նաև, թե ինչու Հայաստանում նավթամթերքի՝ բենզինի գինը չի իջնում, այն դեպքում, երբ միջազգային շուկայում օր օրի նավթի գինը անկում է ապրում: Շաբոյանն այս դեպքում էլ չհամաձայնեց մեզ հետ: «Իհարկե, միջազգային շուկայում, ամռան ամիսներից սկսած, գնային նվազում է նկատվում: Մենք ուսումնասիրել ենք միջազգային շուկայի գները և, միևնույն ժամանակ, խորությամբ ուսումնասիրել ենք նաև ռուսաստանյան գները, քանի որ մեր բենզին ներկրողները այս տարվա փետրվարից սկսած՝ սկսել են բենզին ներկրել Ռուսաստանից, որտեղ նույնպես գների նվազում է նկատվել: Բայց երբ նայում ենք ռուսաստանյան շուկայի գները և համեմատում ենք մեր տեղական շուկայի գների հետ, տեղական շուկայում ևս գների նվազեցում է նկատվում օգոստոս ամսից սկսած»,- ասաց Շաբոյանը՝ նշելով, որ 1 լիտր ռեգուլյար տեսակի բենզինը 470 դրամից նվազել և հասել է 440 դրամի:
ՏՄՊՊՀ նախագահը նշեց նաև, որ չի կարելի գները համեմատել բորսայական գների հետ: «Բորսայական գները չեն կարող միանգամից իրենց ազդեցությունը թողնել պայմանագրերի վրա»:
