Իսրայելցի ղեկավարները կիրակի օրն առաջին անգամ նշել են արաբական երկրներից և Իրանից հրեաների արտաքսման հիշատակի ազգային օրը՝ բարձրացնելով նրանց պատճառով կորցրած սեփականության միլիարդների հասնող փոխհատուցման հարց: Այս մասին հայտնում է Ria Novosti-ն:
Տեղի իշխանությունների տեղեկություններով՝ 1947-1972թթ. Մերձավոր Արևելքի երկրներից ստիպված է եղել փախչել 856 հազար հրեա՝ փրկվելու համար ջարդերից և խտրականությունից: Այս թիվը համեմատելի է արաբների թվի հետ, որոնք նույն ժամանակաշրջանում և նույն պատճառներով լքել են ենթամանդատ Պաղեստինը և ժամանակակից Իսրայելը:
«Չափազանց շատ ժամանակ է ծախսվել, որպեսզի արաբական երկրներից և Իրանից հրեա արտագաղթածների ողբերգությունը ճանաչի իսրայելական հասարակությունը… Նրանց ձայնը, նրանց պատմությունները պետք է հնչեն կրթական հաստատություններում, ԶԼՄ-ներում, արվեստի ոլորտում, իշխանության մարմիններում և պարտադիր միջազգային հարթակում՝ ուղղելու համար պատմական անարդարությունը և ապահովելու համար ֆինանսական հատուցում»,- ասել է Իսրայելի նախագահ Ռեուվեն Ռիվլինը Արտագաղթի և աքսորի հիշատակության օրվա կապակցությամբ հավաքի ժամանակ:
Նոր հիշատակի օրը նշելու մասին օրենքն ընդունել է Իսրայելի խորհրդարանը: Որոշվել է այն նշել նոյեմբերի 30-ին՝ 1947թ. Պաղեստինը հրեական և արաբական պետությունների բաժանելու ծրագիրը ՄԱԿ ԳԱ-ի կողմից հաստատվելու տարելիցի հաջորդ օրը:
Երկու տարի առաջ Երուսաղեմում անցկացվել է փորձագետների համաժողով, որի մասնակիցները մերձավորարևելյան երկրներում հրեաների կորցրած կարողությունը գնահատել են 6 մլրդ դոլար, իսկ ՄԱԿ-ի կողմից նրանց օգնությունը՝ 35 հազար՝ 1950թ. պաղեստինցի փախստականներին հատկացված 13.7 մլրդ-ի փոխարեն:
