Իրավապաշտպան Ժաննա Ալեքսանյանի կարծիքով՝ 6 մեքենաների հրկիզումը, մեկ մեքենայի հրկիզման անհաջող փորձն ու ակտիվստ Գևորգ Սաֆարյանին ծեծի ենթարկելը քաղաքական հետապնդում է և հնարավոր չէր առանց կազմակերպման՝ մեկ գիշերվա մեջ նման գործողություններ անել․ «Եթե ոստիկանությունը մինչ այս պահը քրեական գործ չի հարուցել, մենք չենք կարող բացառել ոստիկանության առնչությունն այդ դեպքերին: Եթե նա անմիջապես չի արձագանքում՝ միայն մեկ դեպքով՝ Սուսաննա Մելքոնյանի դեպքով գործ հարուցում, սարսափելի է, նշանակում է առնչություն ունի: Տպավորություն է, որ այս երկրում իրավապահ մարմիններ չկան»,- ընդգծեց նա:
Նրա խոսքերով՝ եթե ոստիկանությունը չի ուզում բացահայտել այդ անօրինությունները, նշանակում է, որ անմիջական առնչություն ունի․ «Պետք է արձանագրենք, որ վերջին 2-3 տարիներին ահագնացել են ակտիվիստների նկատմամբ բռնությունները. անցած տարի քաղաքի տարբեր մասերում ծեծի էին ենթարկվում ակտիվիստները, ու որևէ գործով բացահայտում չեղավ: Բռնությունը դարձել է ոստիկանության ամենասովորական գործելակերպը: Ես կարծում եմ, որ Վովա Գասպարյանի հայացքը դեպի օրենքը չէ, և նա ընտրելու սկզբունքով է գործում՝ որտեղ ում պետք է ծեծեն: Ես չեմ տեսնում օրենքի ներդաշնակ գործողություն, էլ չեմ ասում, թե որքան տգետ է ոստիկանությունը: Երբ մենք տեսնում ենք դատարաններում որպես կողմ հանդիսացող ոստիկաններին, ապա մտածում ենք, որ լավ կլիներ, որ բարեփոխումներն ուղղված լինեին տգետ ոստիկաններին կրթելուն»,- ընդգծեց Ժաննա Ալեքսանյանը:
Ամբողջությամբ՝ մեր տեսանյութում։
