«Քանի որ, ԱԺ նախագահի որոշմամբ, գլխադասային է նշանակվել տնտեսական հարցերի մշտական հանձնաժողովը, այնտեղ էլ քննարկում է տեղի ունեցել: Ես իմ դիրքորոշումն արտահայտեցի՝ ասելով, որ արտաքին հարաբերությունների հանձնաժողովը կարիք չունի հարակից զեկուցմամբ հանդես գալու»,- հանձնաժողովի նիստից հետո «Առաջին լրատվական»-ի հետ զրույցում ասաց ԲՀԿ-ական պատգամավոր Գուրգեն Արսենյանը:
Հանձնաժողովում այսօր քննարկվում էր ԵՏՄ-ի պայմանագրին Հայաստանի միանալու համաձայնագիրը: Հանձնաժողովի նախագահ Արտակ Զաքարյանը նիստի ժամանակ հայտարարեց, թե իրենք պարտավոր չէին այդ պամանագիրը քննարկել իրենց հանձնաժողովում, քանի որ դրա դեպքում գլխադասայինը տնտեսական հարցերով մշտական հանձնաժողովն է եղել: Բայց, նրա խոսքերով, որպեսզի հետագայում խոսակցություն չլինի, թե ինչու չեն քննարկել, այդ պատճառով էլ հիմա քննարկում են: Քննարկվեց նաև հարցը, թե պայմանագրի հետ կապված՝ արդեն լիագումար նիստի ժամանակ արտաքին հարաբերությունների հարցերի հանձնաժողովն արդյո՞ք պետք է հարակից զեկուցող լինի: Ոչիշխանական խմբակցությունների ներկայացուցիչները դեմ էին՝ ասելով, որ հարակից զեկուցողը պետք է լինի գլխադասային, տվյալ դեպքում՝ տնտեսական հարցերի մշտական հանձնաժողովը:
Իսկ Գ. Արսենյանը կարծում է, որ ի սկզբանե ճիշտ կլիներ, եթե այս հարցով գլխադասայինը լիներ ոչ թե տնտեսական, այլ արտաքին հարցերի մշտական հանձնաժողովը: «Այսինքն՝ արտաքին հարաբերությունների կոմպոնենտը ենթակայացված է տնտեսական հարաբերությունների կոմպոնենտին, ես էլ ասում եմ՝ ուրեմն, արտաքին հարաբերությունների հանձնաժողովը նման հարցերում պետք է հարակից զեկույցով հանդես չգա»,- եզրափակեեց Արսենյանը: