Աֆղանստանում Անվտանգության աջակցության միջազգային ուժերը (ISAF) կսկսեն օժանդակ գործառույթներ իրականացնել՝ ռազմական օպերացիաների հրամանատարությունը փոխանցելով աֆղանական բանակին: Դա տեղի կունենա այս տարվա գարնանը՝ ծրագրված ժամկետից մի քանի ամիս առաջ: Այս մասին ասված է ԱՄՆ և Աֆղանստանի նախագահներ Բարաք Օբամայի և Համիդ Քարզայի՝ Սպիտակ տանը տեղի ունեցած բանակցությունների արդյունքում ընդունված համատեղ հայտարարության մեջ` հայտնում է ITAR-TASS-ը:
Դրանում նաև նշվում է, որ ամռանը պետք է սկսվի կոալիցիոն ուժերից աֆղանական բանակին և հատուկ ծառայություններին Աֆղանստանում անվտանգության պատասխանատվության հանձնման 5-րդ՝ վերջին փուլը: Դրա ճշգրիտ ժամկետները կհամաձայնեցվեն ՆԱՏՕ-ի և Աֆղանստանի կառավարության միջև: Դրանից հետո «ԱՄՆ-ը կդադարի ինքնուրույն իրականացնել ռազմական օպերացիաների մեծ մասը և չի հսկի աֆղանական գյուղերը»:
«Ամերիկյան զորքերը միայն կշարունակեն աֆղանական բանակի ուսուցումը, խորհրդատվությունն ու մատակարարումը»,- ճշգրտել է Օբաման:
Ներկայում Աֆղանստանի զինված ուժերն իրենց երկրի տարածքում իրականացնում են «Ալ-Քաիդա»-ի և «Թալիբան»-ի անդամների դեմ մոտ 80 տոկոս հակաահաբեկչական օպերացիաների հրամանատարությունը: Փետրվարին այս թիվը կհասնի 90 տոկոսի` նշված է ԱՄՆ և Աֆղանստանի ղեկավարների համատեղ հայտարարության մեջ:
Փաստաթղթում նաև հաստատվել է ԱՄՆ-ի մտադրությունը՝ աֆղանական իշխանություններին փոխանցել բանտերի կառավարումը, որոնցում պահվում են վերջին տարիներին Աֆղանստանում ձերբակալված ահաբեկիչները:
ԱՄՆ-ի և ՆԱՏՕ-ի զինված ուժերը ծրագրում են երկու տարվա ընթացքում հեռանալ Աֆղանստանից:
Երկու երկրների նախագահները նաև պայմանավորվել են, որ ԱՄՆ-ը կհատկացնի այս երկրին տրամադրվող հումանիտար օգնության մինչև 80 տոկոսը, որի կեսը պետք է բաշխվի աֆղանական բյուջեով:
