Թուրքիայի նախագահ Ռեջեփ Թայիփ Էրդողանը հայտարարել է, որ կնոջ և տղամարդու միջև չի կարող հավասարություն լինել՝ հերթական անգամ քննադատության մեծ ալիք առաջացնելով: Այս մասին հաղորդում է Associated Press-ը:
Ելույթ ունենալով Ստամբուլում՝ կանանց իրավունքներին նվիրված զանգվածային միջոցառմանը՝ նախագահը հայտարարել է, որ տղամարդու և կնոջ միջև գոյություն ունեցող կենսաբանական տարբերությունները հնարավորություն չեն տալիս նրանց կատարել միևնույն գործառույթները:
«Կանայք և տղամարդիկ տարբեր բնավորություն, սովորույթներ, մարմնի կառուցվածք ունեն: Հնարավոր չէ երեխային կրծքով կերակրող մորը համեմատել տղամարդու հետ: Կանայք չեն կարող իրականացնել նույն աշխատանքը, ինչ անում են տղամարդիկ, ինչպես որ դա լինում էր կոմունիզմի տարիներին որոշ երկրներում: Կնոջը չի կարելի ստիպել հող փորել, դա հակասում է նրա նուրբ և փխրուն բնույթին»,- ասել է Էրդողանը:
Թուրքիայի նախագահը նաև քննադատել թուրք ֆեմինիստներին՝ հայտարարելով, որ նրանք չեն գիտակցում մոր այն բարձր կարգավիճակը, որին կինը կարող է հասնել իսլամական հասարակության մեջ: «Ինքս կհամբուրեի իմ մոր ոտքերը»,- ասել է նա:
Հատկանշական է, որ Թուրքիայի նախագահը բազմից դեմ է հանդես եկել գենդերային հավասարությանը:
Էրդողանի հայտարությունը քննադատության բուռն ալիք է առաջացրել սոցցանցերում: Թուրք փաստաբան և իրավապաշտպան Գուլի Գուլբահարը նրան մեղադրել է երկրի սահմանադրության, թուրքական օրենքների և գենդերային հավասարության վերաբերյալ միջազգային կոնվենցիայի դրույթների խախտման մեջ:
