2011թ. չինական Fortune Oil ընկերությունը հայկական «Նագին» ընկերությունից գնել է Կոտայքի մարզի Հրազդան քաղաքի մոտակայքում գտնվող երկաթի հանքը և այժմ պատրաստվում են այն շահագործել: Այսօր հրազդանցիները բողոքի ակցիա էին կազմակերպել, որպեսզի թույլ չտան հանքի շահագործումը, քանզի այն մեծ էկոլոգիական վնասներ կպատճառի քաղքին և շրջակա տարածքներին, ավելին, հանքի շահագործումը վնասական փոշի է արտանետում, որն էլ բազմաթիվ հիվանդությունների պատճառ կարող է հանդիսանալ:
Հրազդանի «Օրհուս» կենտրոնի համակարգող Անահիտ Մնացականյանը «Առաջին լրատվականի» հետ զրույցում նշեց, որ իրենք բնակչության շրջանում ստորագրահավաք են իրականացրել և պարզվել, որ բնակչության մեծ մասը կա՛մ տեղյակ չէր հանքի շահագործման մասին, կա՛մ էլ մտածում էին, թե լավ է` աշխատատեղեր կբացվեն իրենք էլ կաշխատեն: Սակայն Մնացականյանը փոխանցեց, որ արդեն իսկ կան տեղեկություններ, որ հանքի մոտակայքում սեփականատերերը ուզում են քաղաք կառուցել չինացի բանվորների համար և հանքը հիմնականում շահագործվելու է չինացի աշխատուժի միջոցով:
«Մարդիկ արդեն բավականին գիտակցում են, որ վտանգավոր է հանքի շահագործումը, և կարևորը ոչ թե աշխատանք ունենալ և հիվանդ ապրելն է, այլ կարևորը առողջությունն է, քանզի միևնույն է հրազդանցիները այս ամենից աշխատանք էլ չեն ունենալու»,- նշեց Մնացականյանը: Նա նաև փոպանցեց, որ հանքի հարևանությամբ գտնվող Բանավան թաղամասի բնակիչներին անհայտ անձինք հորդորում են հեռանալ իրենց բնակարաններից և դրա դիմաց անգամ որոշակի գումար են առաջարկում:
Բանավանի բնակիչ, 80-ամյա Հրանտ Ավետիսյանն էլ մեզ պատմեց, թե դեռևս խորհրդային տարիներին հանքը ցանկանում էին շահագործել, սակայն ուսումնասիրություններից հետո պարզվել է, թե այնտեղ նաև ուրան կա և հանքն անմիջապես փակել են:
Նա նշեց, թե կոնկրետ իրեն չեն առաջարկել լքել իր բնակարանը, սակայն նման խոսակցություններ իր հարևաններից լսել է:
Նշենք, որ Հրազդանի հանքի երկաթի հումքը բարձրորակ է` մոտ 40 տոկոս երկաթ պարունակող: