Քաղտեխնոլոգ Արմեն Բադալյանը կարծում է, որ Րաֆֆի Հովհաննիսյանի հացադուլը` որպես քաղաքական պրոյեկտ, զրոյական արժեք ունեցավ:
«Առաջին լրատվականի» հետ զրույցում Արմեն Բադալյանը նշեց, թե այդ ակցիան միայն տեղեկատվական առումով կարողացավ արդյունք գրանցել:
«Լրատվական դաշտը, թողած մյուս բոլոր, ընդ որում կարևոր թեմաները` ԵԱՀԿ ՄԽ համանախագահների հայտարարությունը, մարտի 17-ի հանրահավաքն ու Լևոն Տեր-Պետրոսյանի ելույթը, քննարկում էր Րաֆֆի Հովհաննիսյանի հացադուլը: Տեղեկատվական առումով Րաֆֆի Հովհաննիսյանը կարողացավ երկու շաբաթ շարունակ գտնվել ուշադրության կենտրոնում: Ավելին` նա իր պատգամավորական գործունեության չորս տարիների ընթացքում այդքան չէր արժանացել լրագրողների ուշադրությանը, որքան այս 15 օրերին»,- նշեց Բադալյանը:
Ինչ վերաբերում է Րաֆֆի Հովհաննիսյանի քայլի քաղաքական կողմին, քաղտեխնոլոգը նշեց. «Որպես քաղաքական պրոյեկտ` դա զրոյական արժեք ունեցավ: Քաղաքական պրոյեկտը ենթադրում էր քաղաքական պահանջներ, իսկ Րաֆֆի Հովհաննիսյանի 15 պահանջներից միայն 2-ն էր քաղաքական` չեղյալ հայտարարել կոալիցիոն հայտարարությունը և ճանաչել ԼՂՀ անկախությունը: Իսկ մնացած 13 պահանջները քաղաքական չէին»:
Բադալյանը նաև մեկ այլ կարևոր փաստ մատնանշեց. «Հացադուլը միգուցե այլ արձագանք ստանար արևմուտքում, բայց արևելքում նման պրոյեկտը քաղաքական դիվիդենտներ չի բերում: Դա 15 oրվա PR պրոյեկտ էր»:
Բադալյանի խոսքերով, իշխանություններն ու տարբեր պատգամավորներ սկսեցին Հովհաննիսյանի PR ակցիան օգտագործել սեփական PR-ի համար: «Ընդ որում` Րաֆֆի Հովհաննիսյանի մոտ գալիս էին մարդկային աջակցություն ցույց տալու, այլ ոչ թե քաղաքական: Իսկ դա դեռ չի նշանակում, որ նրան այցելողները «Ժառանգության» ընտրողներն են»,- նշեց նա:
Արմեն Բադալյանը պատգամավորներին խորհուրդ տվեց այցելել անազատության մեջ գտնվող իրենց գործընկերոջը` Սասուն Միքայելյանին, որն առողջական լուրջ խնդիրներ ունի: Արմեն Բադալյանի խոսքերով, Րաֆֆի Հովհաննիսյանին այցելած պատգամավորները Սասուն Միքայելյանին չեն այցելում, քանի որ բանտում չկան լրագրողական տեսախցիկներ ու ձայնագրիչներ:
