ՀՀ առողջապահության նախարար Դերենիկ Դումանյանն այսօր լրագրողների հետ ճեպազրույցում բացառեց Հայաստանում մարդու ներքին օրգանների վաճառքի դեպքերը: «Չկա նման բան և չի կարող լինել: Այս խնդիրը իրավապահների ուշադրության կենտրոնում է եղել: Օկոևը սպառիչ պատասխան էր տվել, ես ավելացնելու ոչինչ չունեմ»,- ասաց նախարարը:
Նա նշեց, որ այս տարի ԱՆ առաջնահերթ խնդիրներից ուշադրության կենտրոնում են լինելու բժշկական որակի խնդիրները, դեղերի ոլորտը` ընդհուպ մինչև գնագոյացման քաղաքականության վարումը, մարզերի համաչափ զարգացման ծրագիրը, ֆինանսների արդյունավետ կառավարումը:
Դումանյանը նշեց, որ սիբիրախտի նոր դեպք չի արձանագրվել, իսկ Ամանորի կապակցությամբ հայտնեց, որ թունավորումների սուր դեպքեր չեն արձանագրվել, ընդհանրապես` նախորդ տարվա համեմատ դեպքերը ավելի քիչ են եղել:
Անդրադառնալով առաջիկա նախագահական ընտրություններին՝ Դ. Դումանյանը հայտարարեց, թե այս տարի մենք ունենալու ենք «ամենաթափանցիկ, ամենաարդար, միջազգային չափանիշներին համապատասխան ընտրություններ»:
