Դեկտեմբերին Ստամբուլի հայկական Սամաթիա թաղամասում հայ տարեց երկու կանանց նկատմամբ գրանցված բռնությունները տարատեսակ մեկնաբանությունների պատճառ դարձան: Դրանք որակվեցին, որպես «ատելության հողի վրա իրականացված ոճիրներ»: «Առաջին լրատվական»-ի հետ զրույցում Պոլսո Հայոց պատրիարքական ընդհանուր փոխանորդ Արամ արքեպիսկոպոս Աթեշյանն ասաց, որ նման մարդկային սպանությունները ցավալի են, սակայն արդար չէ դրանք որակել որպես զուտ հայերին ուղղված արարքներ։
Նա նշեց, որ սպանության դեպքի մասին լսել են, որովհետև հայ է սպանվել։ Սակայն, նրա խոսքերով, նման տասնյակ ոճիրներ են գրանցվում:
«Հնարավոր է, որ ատելության պատճառով իրականացված ոճիր լինի, սակայն նման ոճիրներն ընդհանրապես ազգության պատճառից ավելի նրանց ունեցվածքը ձեռք բերելու պատճառով է: Եթե հարցը դիտարկում ենք ատելության և ազգային պատկանելության տեսանկյունից, ապա պետք է մտածել, որ թուրք էր սպանվել ՀՀ քաղաքացու ձեռքով: Թուրքիայում ոչ ոք այդ սպանությունն ատելությանը չվերագրեց»,- նշեց սրբազանը:
Անդրադառնալով խոսակցություններին, թե Թուրքիայի հայ համայնքում տագնապ է առաջացել, ասաց, որ Թուրքիայի հայ համայնքի ներկայացուցիչը Թուրքիայում Հայոց Պատրիարքարանն է և չգիտի, թե ովքեր են համայնքի ներկայացուցիչները, որոնք մտահոգված են։ Նրա կարծիքով՝ տագնապի մասին խոսել, ինքնին տագնապ ստեղծել է նշանակում, քանի որ տագնապ գոյություն չունի։ «Հարցը համայնքային ցավ է, պարզապես՝ անարգ ու անարդար ոճիր։ Պատրիարքական Աթոռը հետևողն է հարցի լուծման»,- ցավով ասաց սրբազանը։
Հարցին, թե ինչպես են անցել հայ համայնքում տոները ոճրագործությունից հետո, նա պատասխանեց. «Ուր կա ցավ, հնարավոր չէ ամբողջական ցնծություն։ Սակայն, Ստամբուլի հայ համայնքն Ամանորն ու Սուրբ Ծնունդը տոնական ուրախությամբ և աղոթքներով ապրեց»։
Պոլսո Հայոց պատրիարքական ընդհանուր փոխանորդ Արամ արքեպիսկոպոս Աթեշյանը վստահեցրեց, որ Թուրքիայում հայ-թուրքական հարաբերություններում ոչ մի լուրջ խնդիր գոյություն չունի և հայ համայնքի գոյությունը պահպանելու ուղղությամբ դժվարություններ չկան։ Նա պարզաբանեց, որ երբ փոքր հարցեր են առաջանում, համապատասխան մարմինների հետ կապ պահելով՝ բոլոր հարցերը լուծվում են։
Հիշեցնենք, որ դեկտեմբերի 28-ին Ստամբուլի հայկական թաղամասում դաժանորեն սպանվել էր հայ համայնքի ներկայացուցիչ մի կին՝ Մարիցա Քյուչուքը, ով դանակի 7 հարված էր ստացել Սամաթիայի իր տանը, և որին հայտնաբերել էր նրա դուստրը: «Ակօս» թերթի գլխավոր խմբագիր Ռոբեր Քոփթաշը Թուրքիայի ոստիկանության ուշադրությունն էր հրավիրել հետևյալ հանգամանքի վրա. սպանված կնոջ մարմնի վրա մարդասպանի կողմից նկարված է եղել խաչ, սակայն ոստիկանությունը դեռևս շարունակում է քննությունը: Սա հայերի դեմ իրականացված միակ ոճիրը չէր նույն ամսվա ընթացքում: Դեկտեմբերի սկզբին 87-ամյա մեկ այլ հայ կին ծեծի էր ենթարկվել:
