Եթե սիրիական ճգնաժամը չավարտվի 2013թ-ին, Սիրիան կդադարի գոյություն ունենալ, հայտարարել է ՄԱԿ-ի ու Արաբական պետությունների լիգայի հատուկ հանձնակատար Լախդար Բրահիմին չորեքշաբթի օրը BBC-ին տված հարցազրույցում:
Բրահիմին ասել է, որ Սիրիայի նախագահ Բաշար Ասադի՝ իր ազգին արված հայտարարությունը, որում նա զինված հակամարտության համար մեղադրում է «ապստամբներին և ահաբեկիչներն», «բաց թողած հնարավորություն է»:
Նրա խոսքերով՝ Ասադի վերջին ելույթն ավելի շատ էր միակողմանի, քան նախորդները:
Բրահիմին հայտարարել է նաև, որ առայժմ ոչ մի առաջընթաց չի տեսնում Սիրիայի կառավարության և ընդդիմության միջև ընթացող բանակցություններում, որը պետք է աջակցեր արևմտյան պետությունների միջև սիրիական հարցի շուրջ տարաձայնությունների հարթմանը, տեղեկացնում է BBC-ին:
ՄԱԿ-ի և Արաբական երկրների լիգայի հատուկ ներկայացուցիչը հաստատել է, որ Ասադն իրեն ասել է 2014թ-ի նախագահական ընտրություններին իր թեկնածությունն առաջադրելու մտադրության մասին:
Միևնույն ժամանակ, Ռուսաստանի ԱԳ նախարարությունը հայտարարել է, որ ՌԴ-ի, ԱՄՆ-ի դիվանագետների և հատուկ հանձնակատար Լախդար Բրահիմի մասնակցությամբ կայանալիք եռակողմ հանդիպմանը ռուսական կողմը արդյունավետ առաջարկություններ է ակնկալում միջազգային աջակցությամբ Սիրիական ներքին սուր ճգնաժամը հարթելու ուղիներ գտնելու վերաբերյալ:
Ինչպես նշում է ВЗГЛЯД-ը, կիրակի օրը Ասադը ներկայացրել է իր դիտարկումները երկրում տիրող իրավիճակի վերաբերյալ և առաջարկել է ճգնաժամի լուծման փուլային տարբերակ, մասնավորապես, արտասահմանյան երկրների ահաբեկիչների ֆինանսավորումը դադարեցնելու պարտավորություն, նոր կառավարության ստեղծում, նոր սահմանադրության մշակում և համընդհանուր համաներման հայտարարում:
ԱՄՆ-ում Ասադի ծրագիրն արդեն «իրականությունից կտրված» են համարում: Միևնույն ժամանակ Իրանի իշխանությունները կոչ են անում իրականացնել Ասադի ծրագիրը:
