Այսօր Առևտրաարդյունաբերական պալատում քննարկվում էին հունվարի 1-ին ԵՏՄ-ին Հայաստանի անդամակցությունից հետո հայ-ռուսական առևտրատնտեսական հարաբերությունների զարգացման հեռանկարները՝ «նոր շուկաներ-նոր հեռանկարներ» խորագրով: Ռուսաստանից Հայաստան ժամանած ոչ հայտնի մի քանի ընկերությունների ղեկավարներ ծանոթանում էին Հայաստանի շուկայի, տնտեսության հետ: Իսկ մեր տեղացի գործընկերները բավական հանգամանալից, ընդհուպ հիշեցնելով, որ մեր պետական լեզուն հայերենն է, և որ Հայաստանում հայեր են ապրում, որոնք 100 տոկոսով տիրապետում են ռուսերենին, ինֆորմացնում էին իրենց ռուս գործընկերներին: Ենթադրվում է, որ ներկայացվող պայմաններից հետո հունվարի 1-ից արդեն որոշակի համագործակցություն կսկսեն:
Երևանի պետական բժշկական համալսարանի օրթոպեդիկ ստոմատոլոգիայի ամբիոնի վարիչ, Եվրոդենտ ստոմատոլոգիայի կենտրոնի տնօրեն Լևոն Գրիգորյանը բավական ոգևորված էր սպասվող հեռանկարներից: Նրա խոսքով՝ Ռուսաստանից հնարավոր կլինի առավել մատչելի տեխնիկա և ստոմատոլոգիական նյութեր ձեռք բերել, ինչն էլ, բնականաբար, կազդի ծառայությունների սակագների վրա:
«Ամեն հանրապետություն ունի իր կոնկրետ ոլորտները, տեխնոլոգիաները, բայց իմ իմանալով՝ ռուսական տեխնոլոգիաները ևս բավական առաջադեմ են: Հատկապես ստոմատոլոգիական բնագավառում այս համագործակցությունը մեզ համար անհրաժեշտություն է: Իրենց արտադրած նյութերը, սարքավորումները երբեք չեն զիջում եվրոպական ինչ-որ թանկարժեք ապարատների ու սարքավորումների»,- «Առաջին լրատվական»-ի հետ զրույցում ասաց Գրիգորյանը: Մեր հարցին, թե դա նշանակո՞ւմ է, որ հունվարի 1-ից հետո հնարավոր կլինի առավել մատչելի բուժել ատամները, մեր զրուցակիցը պատասխանեց. «Միանշանակ: Այսօր Ռուսաստանն արտադրում է ունիկալ համակարգչային ստոմատոլոգիական տոմոգրաֆներ, որոնց գինը բանական ցածր է, ինչն էլ կնպաստի նրան, որ մենք այստեղ ավելի ցածր գներով սպասարկենք մեր բնակչությանը: Կարծում եմ՝ սա շատ մեծ առավելություն է»:
