Դեկտեմբերի 5-ից Գյումրիում գրեթե անդադար տեղացած ձյան շերտը, ինչպես հայտնում են տեղի բնակիչները, 50-60 սանտիմետրի է հասել: Քաղաքի փողոցներում անմխիթար վիճակ է՝ խցանումներ, մերկասառույց: Ըստ «Հայկական ժամանակ»-ի՝ տեղեկություններ կան, որ քաղաքի երկրորդական փողոցներն ընդհանրապես չեն մաքրվում: Խնդրի շուրջ «ՀԺ»-ն զրուցեց Գյումրիի քաղաքապետ Սամվել Բալասանյանի խոսնակ Զոհրապ Եգանյանի հետ:
– Պարոն Եգանյան, Գյումրիից տեղեկություններ են ստացվում, որ ճանապարհները շատ վատ վիճակում են, չեն մաքրվում ու անանցանելի են, ինչո՞ւ չի մաքրվում քաղաքը:
– Ճանապարհները մաքրվում են ինչքանով կա տեխնիկա, այսինքն, ինչքանով մենք կարողացանք տեխնիկա ստանալ և նվերների տեսքով և վերանորոգելու տեսքով: Այդ տեխնիկան ամբողջությամբ աշխատում է, և տեխնիկայի չափով՝ ինչքան որ թույլ են տալիս մեր հնարավորությունները, գիշերվա ժամը 6-7-ից ճանապարհները մաքրվում են: Այս պահին գոնե հիմնական ճանապարհներն արդեն մաքրված են: Իհարկե, երկրորդական փողոցները ամբողջությամբ մաքրել հնարավոր չէ, դժվարություններ կան, իդեալական վիճակ չէ, բայց ամեն ինչ անում է քաղաքապետարանը, որպեսզի վիճակը նորմալ լինի:
– Իսկ նախկինում ինչպե՞ս էր մաքրվում քաղաքը:
– Նախկինի մասին երևի ճիշտ կանեք հարցնեք վարորդներին կամ տեղում ապրած մարդկանց, բայց շատ եմ լսում կարծիքներ, որ մի քանի քայլով առաջընթաց կա, բայց դա ևս բավարար չէ: Այն, որ սա բավարար չէ, ես ևս համաձայն եմ:
– Բայց կարծեմ, քաղաքապետի կուսակցության առաջնորդն էլ էր վերջերս տեխնիկա բերել Գյումրի:
– Այո, պարոն Ծառուկյանի բերած տեխնիկայի հետ կապված որոշ տեխնիկական խնդիրներ կային, պետք է հարմարեցվեին, ձյուն մաքրող սարքավորումներ կցվեին այդ տեխնիկային, բայց այժմ նրանք ևս աշխատում են:
– Իսկ մյուս՝ երկրորդական փողոցները պետք է մի կերպ յոլա գնա՞ն:
– Եկրորդական փողոցները ինչքան որ թույլ են տալիս մեր հնարավորությունները, փորձում ենք մաքրել, ինչ վերաբերում է մայթերին, ուղղակի կխնդրենք, որ սպասարկման օբյեկտների տերերը իրենք իրենց խանութների դիմաց, իիենց մայթերը գոնե իրենք մաքրեն, քաղաքապետարանը չի կարող ամբողջությամբ մայթերի մաքրությունը այս պահի դրությամբ ապահովել:
