Բրիտանական հայտնի Sun տաբլոիդը իր կիրակնօրյա հրապարակման մեջ ռեպորտաժ էր տեղադրել լեհական Լոձ քաղաքի մասին՝ այն ներկայացնելով որպես մեռնող ու լքված բնակավայր:
Ինչպես տեղեկացնում է ITAR-TASS-ը, նյութի համար որպես իլյուստրացիա են ծառայել դատարկ փողոցները, փակ առևտրի կետերը և իռլանդական փաբի մոտ կանգնած ալկոհոլիկը:
«Նման դեկորացիաներ չեն եղել Երկրորդ համաշխարհային պատերազմից ի վեր՝ դատարկ շինություններ, փակ խանութներ, աղքատներ ու ծերունի՝ կանգնած հացի հերթում»,- սկսում է իր զեկույցը Լոձի մասին Sun-ի թղթակիցը
«Պետրովսկայան Լեհաստանի ամենաերկար՝ 4 կմ-ից ավելի ձգվող փողոցներից է, որը դատարկ է անգամ օրվա կեսին»,- գրում է նա:
Վիճակագրությունը նույնպես վկայում է, որ լեհերը Միացյալ Թագավորությունում թվաքանակով երկրորդ ազգային խումբն են, պաշտոնական տվյալներով` շուրջ 600 հազար մարդ:
Լեհաստանը ռեպորտաժից աղմուկ չի բարձրացրել, փոխարենը լոձի բնակիչներն են վրդովվել: Լոձի քաղաքապետի խոսքով՝ տեղի իշխանությունները դատի են տալու տաբլոիդին, ինչպես նաև դիմելու են երկրի ԱԳՆ-ին՝ պաշտպանելու իրենց քաղաքի բարի համբավը:
Ներկայում Լոձը Լեհաստանի խոշորագույն քաղաքներից է, որը գտնվում է մայրաքաղաքից 120 կմ հեռավորության վրա: Քաղաքի բնակչության թվով այն երրորդն է` Վարշավայից ու Կրակովից հետո:
