Քաղաքագետ Երվանդ Բոզոյանի խոսքերով, Արաբական աշխարհի այս ծանր վիճակը և Ճապոնիայի ատոմակայանի հետ կապված խնդիրը, կարող է լուրջ պրոբլեմներ առաջացնել և բնականաբար մեծացնել նավթի գնի աճի միտումը: Սակայն, ըստ նրա, այն հանգամանքը, որ Միացյալ Նահանգներում նավթի պաշարներն ավելի մեծ էին, քան կանխատեսվում էր, բավականին զսպող դեր կկատարի:
«Միջազգային շուկաների կոնյուկտուրան այնպիսի վիճակի մեջ է, որ նավթի գինը, ինչպես և ոսկու գինը, անընդհատ պետք է մեծանա, սա օբյեկտիվ վիճակ է, և մենք պետք է հաշվի առնենք, որ այս ամենը կարող է հանգեցնել ֆորսմաժորային իրավիճակների և ճգնաժամերի առաջացման»,- «Առաջին լրատվականի» հետ զրույցում կարծիք հայտնեց քաղաքագետ Երվանդ Բոզոյանը:
Քաղաքագետի գնահատմամբ, ճիշտ է, նավթի թանկացումից Ադրբեջանը կօգտվի, սակայն այդ ամենը ուղղակիորեն չի ազդի մեր տարածաշրջանի վրա.
«Դա օբյեկտիվ իրականություն է, և այդ ամենի արդյունքում Ադրբեջանի տնտեսությունն էլ ավելի է հզորանալու: Սակայն մենք ունենք մեկ այլ առավելություն. Ադրբեջանը վարում է նավթի միակողմանի տնտեսական քաղաքականություն, իսկ այդպիսի երկրներ շատ կան: Իսկ հեռանկարային իմաստով նավթի գործոնը Ադրբեջանի վրա բավականին բացասական կարող է ազդել»:
Բոզոյանի դիտարկմամբ, պետք չէ ընկճվել այն հանգամանքից, որ Ադրբեջանը կօգտվի նավթի գնի թանկացումից և էլ ավելի կմեծացնի իր ռազմական բյուջեն, այլ ավելի ճիշտ է, որպեսզի Հայաստանը ստեղծի դիվերսիֆիկացված` դեպի արտահանմանն ուղղված տնտեսություն, որն էլ կկարողանա հետագայում կոմպեսացնել այն բոլոր վտանգները, որոնք կապված են նավթի հետ.
«Ի վերջո, ռազմավարական իմաստով հաղթում են այն երկրները, որոնք ունեն դեմոկրատական համակարգ և ազատ տնտեսություն: Ի վերջո, նավթը երաշխիք չէ, որ երկիրը կդառնա իսկապես զարգացած և հեռանկարային իմաստով լուրջ երկիր»: