Վրացական Apsny.ge կայքի փոխանցմամբ, Վրաստանում ԵՄ ներկայացուցչության ղեկավար Ֆիլիպ Դիմիտրովն անդրադարձ է կատարել Վրաստանի ներքին խնդիրներին.
«Վրաստանում մարդիկ իրենց իշխանություններին ներկայացնում են իրենց պահանջները, ինչը, իմ կարծիքով, նորմալ երևույթ է: Դա հանդիսանում է պետության ժողովրդավարության զարգացման մի մասը:
Ոմանք մոռանում են, որ ժողովրդավարության կառուցումն ընթանում է շաբաթական 7 օր և օրական 24 ժամ: Վրաստանը շատ բաների է հասել ժողովրդավարական ինստիտուտների զարգացման տեսանկյունից:
Վրացական լրատվամիջոցները տարբեր մոտեցումներով են մեկնաբանում երկրում տեղի ունեցած իրադարձությունները, ինչը նույնպես նորմալ է: Այդպիսի իրավիճակ է տիրում ժողովրդավարական շատ երկրներում: Կարևորն այն է, որ լրատվամիջոցները գտնվեն հավասար պայմաններում:
Չնայած այդ ամենին` հանուն արդարության, պետք է նշել, որ ժողովրդավարությունը Վրաստանում դեռևս գտնվում է կազմավորման գործընթացում:
Ինչ վերաբերում է Վրաստանում հնարավոր նոր հեղափոխությանը, ես արդեն երեք ամիս է, ինչ գտնվում եմ Վրաստանում և չեմ կարծում, թե պետք է հեղափոխություն ակնկալել: 20-րդ դարում էլ տեղի ունեցան հեղափոխություններ (կոմունիստական ու նացիստական), որոնք ինձ սրտամոտ չեն: Սակայն բոլորն արտահայտվելու իրավունք ունեն»:
