Վրաստանի ֆինանսների նախարար Նոդար Խադուրին ընդունել է, որ վրացական արտադրանքի արտահանման համար այլընտրանք չկա, ռուսական շուկայից բացի:
«Մեր շուրջը մի քանի խոշոր շուկաներ են` Թուրքիա, Ռուսաստան և Եվրոպա: Իհարկե, մեր խնդիրն այն է, որպեսզի Վրաստանը դառնա եվրոպական երկիր, և մենք աշխատում ենք ԵՄ-ի հետ համապարփակ առևտրի պայմանագրի շուրջ, սակայն պետք է հասկանանք, որ եվրոպական շուկա հենց այնպես մուտք գործել չի կարելի»,- հայտարարել է նախարարը:
Նախարարի խոսքերով՝ Եվրոպայում որակի նկատմամբ շատ խիստ վերահսկողություն է, գործում է կատարյալ աշխատանքային և հակամենաշնորհային օրենսդրություն: Բացի այդ, եվրոպացիները վրացական արտադրանքին ծանոթ չեն, այդ պատճառով վրացական արտադրանքի` եվրոպական շուկա մուտքը աստիճանաբար տեղի կունենա:
Ինչ վերաբերում է ռուսական շուկային, ապա նախարարը կարծում է, որ այդ գործը կարելի է կարգավորել ավելի արագ և առավել քիչ ծախսերով:
«Ռուսաստանի բնակիչները գիտեն, թե ինչ է վրացական արտադրանքը: Ուղղակի նրանց պետք է հիշեցնել այդ մասին: Ռուսական շուկայից բացի, Վրաստանը դեռևս այլընտրանք չունի, չնայած, կրկնում եմ, խնդիրն այն է, որ մեր արտադրանքը դառնա մրցակցային, պետք է սկզբում նվաճել ներքին շուկան, այնուհետև դուրս գալ ռուսական շուկա և դրանից հետո արտադրանքը դուրս բերել ամերիկյան և եվրոպական շուկաներ»,- հայտարարել է Խադուրին:
Գինու և հանքային ջրերի արտադրությամբ զբաղվող վրացական 20 ընկերություններ պատրաստվում են դուրս գալ ռուսական շուկա: Անցյալ տարվա վերջին վրաց-ռուսական տնտեսական համագործակցության կենտրոնի ղեկավար Գեորգի Սետուրիձեն հայտարարել էր, որ մնում է հստակեցնել արտահանման ժամանակացույցը, որը հայտնի պետք է դառնար պաշտոնական կառույցների անմիջական հանդիպումից հետո:
Վրացական արտադրանքը ռուսական շուկա կրկին արտահանելու համար ռուսական կողմի հետ բանակցություններում որպես միջնորդ հանդես կգա Ռուսաստանի հետ հարաբերությունների կարգավորման հարցերով Վրաստանի վարչապետի հատուկ ներկայացուցիչ Զուրաբ Աբաշիձեն:
Վրաստանի գյուղատնտեսության նախարարի խոսքերով՝ այդ բանակցությունները կսկսվեն տոնական օրերից հետո: Բոլոր վրացական գինու արտադրությամբ զբաղվող ընկերություններն այս առումով միևնույն մոտեցումն ունեն. առանց սահմանափակումների իրենց արտադրանքը ռուսական շուկա արտահանել:
Վրաստանի սպառողների իրավունքների պաշտպանության կենտրոնի ղեկավարը հայտարարել է, որ տոնական օրերից հետո պատրաստ է հանդիպել վրացական ալկոհոլային խմիչքներ արտադրող ընկերությունների ղեկավարների հետ:
ՌԴ նախագահ Պուտինը դեկտեմբերի 20-ին կայացած մամլո ասուլիսում ասել էր, որ Ռուսաստանը Վրաստանի հետ հարաբերությունների կարգավորման կողմնակից է, և Առևտրի համաշխարհային կազմակերպության առաջ ստանձնած պարտավորությունները կատարելով` թույլ կտա վրացական արտադրանքի ներմուծումը Ռուսաստան:
Ռուսաստան վրացական գինու, հանքային ջրերի և գյուղատնտեսական այլ ապրանքների ներմուծումն արգելվել էր 2006 թ.` ռուս-վրացական պատերազմի հետևանքով: Պաշտոնապես հայտարարվել էր, որ պատճառը վրացական արտադրանքի որակն է:
