Թուրքական Zaman թերթի փոխանցմամբ, Թուրքիայի Վիճակագրական վարչությունը հայտնել է, որ 2010 թվականին Թուրքիայի տնտեսությունը 8.9 տոկոսանոց աճ է արձանագրել: Ընդ որում, նախորդ տարվա վերջին եռամսյակին գրանցված տնտեսական աճը կազմել է 9.2 տոկոս:
Համախառը ներքին արդյունքն (ՀՆԱ) աճել է 16 տոկոսով` հասնելով 1.1 տրիլիոն թուրքական լիրայի:
Մեկ շնչին բաժին ընկնող ազգային եկամուտը կազմել է 15,138 թուրքական լիրա (10,079 ամերիկյան դոլար):
Նշվում է, որ այս ցուցանիշներով Թուրքիան Եվրոպայում զբաղեցրել է առաջին տեղը, իսկ ողջ աշխարհում` առաջատար դիրքերից մեկը:
Հիշեցնենք, որ 2010 թվականի դեկտեմբերի վերջին անգլիական The Economist պարբերականի խմբագիր Ջոն Փիթն իր վերլուծական հոդվածում նշված էր.
«Վերջին երկու տարիների ընթացքում Թուրքիայի տնտեսությունը Եվրոպայի ամենաարագ զարգացող տնտեսությունն է: Կանխատեսվում է, որ 2011 թվականին տնտեսական զարգացման աճի ցուցանիշով Թուրքիան կզիջի միայն Չինաստանին, Հնդկաստանին և մի շարք այլ զարգացող երկրների»:
Իսկ հոկտեմբերի 22-ին անգլիական նույն պարբերականում Թուրքիան անվանված էր «Եվրոպայի Չինաստան»:
