Մեդիամագնատ Ռուպերտ Մերդոկն ու բնապահպանները Twitter-ում թեժ քննարկում են ծավալել օրգանական հանածո վառելիքի թեմայով: Մերդոկը պնդում է, որ հանածո վառելիքը աշխարհն ավելի կանաչ կդարձնի: Այս մասին հայտնում է The Daily Mail-ը:
Մերդոկը թուիթով պատասխանել է Wall Street Journal-ի հոդվածին այն մասին, որ ածխաթթու գազը մոլորակն ավելի կանաչ է դարձնում: Հոդվածում ասվում է, որ 30 տարում արբանյակային լուսանկարներից երևում է, որ Երկիրն իսկապես ավելի կանաչ է դարձել:
Նորարարական եղանակներով ստացված էներգիայի քննադատ Մերդոկը գրել է. «Աշխարհը գնալով կանաչում է ածխաթթու գազի մեծ քանակության շնորհիվ: Արբանյակային 30 տարվա լուսանկարներում երևում է, որ անտառներն ավելի խիտ և արագ են աճում»:
Նշենք, որ հոդվածն ու Մերդոկի դիրքորոշումը դեմ են բնապահպանների փաստարկներին այն մասին, որ մեր մոլորակը անտառահատումների հետևանքով ռիսկի տակ է գտնվում, քանի որ փխրուն էկոհամակարգը վնասվում է:
