Թուրքական Posta թերթում տպագրված Շառլ Ազնավուրի հետ հարցազրույցը շատ հնարավոր է՝ խմբագրված լինի, այսինքն՝ Ազնավուրի խոսքը կարող է խմբագրել են: Այս մասին մեզ հետ զրույցում նշեց Ստամբուլի «Ակոս» շաբաթաթերթի հայերեն բաժնի խմբագիր Բագրատ Էստուկյանը:
«Բայց մյուս կողմից՝ Շառլ Ազնավուրը միշտ էլ խոսել է հայ-թուրքական բարեկամության կարևորության մասին, ու այդ տեսանկյունից հարցազրույցում բերված խոսքերն ինձ այնքան էլ չզարմացրին: Գուցե որոշ ազգայնական հայերի համար դա անհավատալի երևույթ էր, բայց ոչ՝ ինձ համար, քանի որ ես ինքս էլ կարող էի այդ նույնն ասել»,- «Առաջին լրատվական»-ի հետ զրույցում ասաց նա:
Դիտարկմանը, որ Հայաստանի ԱԳՆ-ն և անձամբ Շառլ Ազնավուրը պնդում են, որ աշխարհահռչակ շանսոնյեն Posta-ին նման հարցազրույց չի տվել, և նրա խոսքը խեղաթյուրվել է, Էստուկյանն արձագանքեց. «Դե, եթե այդպես է ասում Ազնավուրը, ուրեմն դրա մեջ ճշմարտություն կա, բայց կան այդ հանդիպման լուսանկարները, այսինքն՝ հանդիպում եղել է: Շատ հավանական է, որ նրա խոսքը թերթում պարզապես խեղաթյուրվել է»:
Նա վստահություն հայտնեց, որ Ազնավուրը այդ հանդիպմանը ասել է նաև այլ բաներ, որոնց Posta թերթը չի անդրադարձել: «Թերթը անդրադարձել է Ազնավուրի խոսքի այն մասին, որն իրեն է ձեռնտու եղել, և դա արել է չափազանցված: Դա զարմանալի չէ թուրքական մամուլի պարագայում: Մենք այստեղ այնքան էլ մեծ վստահություն չենք տածում տեղի մամուլին»,- ընդգծեց հայ խմբագիրը:
Նա նկատեց, որ Posta-ն, ինչպես նաև մի քանի այլ թուրքական թերթեր, սկանդալային լուրերի հետևից են վազում և վստահություն չեն ներշնչում:
Ինչ վերաբերում է այդ հարցազրույցի արձագանքներին թուրքահայ համայնքում, Էստուկյանը նկատեց. «Սփյուռքի հասարակական միտքը հիմա շատ զբաղված է նրանով, թե Հայոց ցեղասպանության 100-րդ տարելիցի նախաշեմին ինչ իրադարձություններ, ինչ զարգացումներ կարող են լինել Թուրքիայում, ավելի շատ սպասողական վիճակում են: Ու հնարավոր է՝ այս հարցազրույցով փորձ էր արվում տնտղել հայկական համայնքի տրամադրությունները»:
Նա նշեց, որ թեև այդ հարցազրույցի հերքում չի եղել, բայց շատ մեծ է հավանականությունը, որ այն սուտ լինի:
