Google ընկերությունը մարտի 30-ին ներդրել է «+1» գործիքը, որը թույլ է տալիս օգտատերերին իրենց ընկերներին խորհուրդ տալ այս կամ այն էջն ինտերնետում: Այս մասին հաղորդվում է Google-ի պաշտոնական բլոգում:
«+1»-ը հասանելի է թեստային ռեժիմով google.com կայքի անգլիալեզու որոնողական համակարգում կայքեր փնտրելիս: Որպեսզի հնարավոր լինի օգտվել այդ գործիքից, անհրաժեշտ է ունենալ բաց (հրապարակային) հաշիվ Google-ում՝ նախապես գրանցվելով Google-ի համակարգում: Այստեղ կպահպանվեն բոլոր հղումները, որոնք նշվել են «+1»-ով:
Ենթադրվում է, որ շուտով կայքերի հեղինակներն ու տերերը իրենց կայքում կներդնեն «+1» գործիքը, ինչը Google-ի օգտատերերին թույլ կտա տեսնել, թե օգտատիրոջ ընկերներից ով է հավանում այդ կայքը:
Սա Google-ի պատասխանն է Facebook-ի «Հավանել» կոճակին, որով փորձ է արվում ավելի սոցիալականացնել ծառայությունը: