Մեծ Բրիտանիայի վարչապետ Դեվիդ Քեմերոնը հայտարարել է, որ ցանկանում է մնալ իր պաշտոնին ևս մեկ ժամկետով, եթե ընտրողներն աջակցեն իրեն։
46 տարեկան Քեմերոնը պահպանողականների կուսակցության ղեկավարն է, 2010-ից նա ղեկավարում է կոալիցիոն կառավարությունը, որը Երկրորդ աշխարհամարտից հետո առաջին կոալիցիոն կառավարությունն է ՄԹ-ում։
Գալիք շաբաթվա ընթացքում ինքը և իր տեղակալ՝ լիբերալ-դեմոկրատների ղեկավար Նիլ Քլեգը պետք է հանրայնացնեն իրենց իշխանության տարիների առաջին կեսի արդյունքները։
Կիրակի օրը BBC-ի եթերում վարչապետը հայտարել է, որ 2015-ի ընտրություններին հաղթելու դեպքում նա մտադիր է կառավարություն կազմել միայն պահպանողականներից։
Mail on Sunday պարբերականի պատվերով Survation կազմակերպության կողմից անցկացված հարցումների տվյալներով՝ ընդդիմադիր լեյբորիստներին նախընտրում է հարցված բրիտանացիների 38%-ը, պահպանողականներին՝ 29%-ը, երրոդ տեղը զբաղեցնում է ՄԹ անկախության կուսակցությունը (UKIP)՝ 16%, հաջորդում են լիբերալ-դեմոկրատները՝ 11%։ Եթե 2015-ի ընտրություններին ներկայիս կառավարության չափազանց ազատական քաղաքականությունից դժգոհ ծայրահեղ պահպանողական ընտրազանգվածից UKIP-ին հաջողվի ձայներ խլել Քեմերոնի կուսակցության հաշվին, ապա խորհրդարանում մեծամասնություն կկազմեն լեյբորիստները։
