Freedom House իրավապաշտպան կազմակերպությունը հանդես է եկել հայտարարությամբ՝ կապված Լեյլա Յունուսի փաստաբանին նրա պաշտպանության գործընթացից հեռացնելու հետ: Այս մասին հայտնում է contact.az-ը:
«Իրավապաշտպաններին պետական լուրջ հանցագործությունների մեջ մեղադրելով՝ Ադրբեջանի իշխանությունները հարգանքի լրիվ բացակայություն են դրսևորում օրենքի գերակայության հանդեպ և ձգտում են վախեցնել անկախ քաղաքացիական հասարակությանը»,- հայտարարել է Freedom House-ի ղեկավար Դևիդ Քրամերը:
«Լեյլա Յունուսին և այլ իրավապաշտպանների ներկայացնելով ծանր և չհիմնավորված մեղադրանքներ, նրանց դատապարտելով երկար ժամկետներով՝ Ադրբեջանը ոչ միայն ծաղրում է իր իրավական համակարգը: Յունուսին զրկելով փաստաբանի միջոցով պաշտպանվելու հնարավորությունից՝ իշխանությունները նաև ցույց են տալիս, որ վախենում են սեփական քաղաքացիներից»,- նշել է նա:
Freedom House-ն Ադրբեջանի իշխանություններին կոչ է անում Լեյլա Յունուսի և այլ իրավապաշտպանների վրայից հանել բոլոր մեղադրանքները և վերականգնել նրանց բոլոր իրավունքները:
contact.az-ը հիշեցնում է, որ վերջերս Ադրբեջանի դատախազությունը Լեյլա Յունուսի պաշտպանությունից հեռացրել է փաստաբաններ Ջավադ Ջավադովին և Խալիդ Բագիրովին, նույն ճակատագրին կարող է արժանանալ նաև Ալաիֆ Հասանովը:
